Тюнене Москвада  РФ-ни Правительствосуну вице-премьери Дмитрий Козакны башчылыгъында селектор кенгеш болгъанды. Анда конкуренциягъа чыдамлыкъны кючлендириуню  корпоратив программасын жашауда бардыргъан организациялагъа болушлукъ бериуню онглары  сюзюлгендиле. Кенгешге видеоконференция байламлыкъла халда КъМР-ни Башчысыны къуллугъун болжаллы халда толтургъан Казбек Коков да къатышханды.
«Халкъла аралы кооперация бла экспорт» миллет проектни «Промышленный экспорт» федерал проектини чеклеринде, деп чертгенди Дмитрий Николаевич, кенгешни ача, конкуренциягъа чыдамлыкъны кючлендириуню корпоратив программасына кёре ишлеген, федерал эмда регион даражалы товарла чыгъаргъан  предприятияланы бир тизмеси жарашдырылып, къабыл кёрюлгенди. Россейни Промышленность эм сатыу-алыу министерствосу  биринчи  апрельден башлап тийишли келишимле этиллик компанияланы айырып тебирерикди.
Ахыр эсеплеге кёре, россейли компанияланы экспортёрлагъа тюзюнлей субсидияладан башлап проектлерине льготалы кредитле бериуге  дери мадарла этилликдиле.  Миллет проектни жашауда бардырыугъа регионланы къошуугъа уллу эс буруллукъду.  Ала болушлукъ этиллик экспортёрланы санына къошуллукъ предприятияланы тизмесин жарашдырлыкъдыла.
Эсигизге салайыкъ, Къабарты-Малкъарда сырьёгъа саналмагъан затланы тышына сатыугъа «Терекалмаз», Нальчикни бийик вольтлу аппаратура чыгъаргъан заводу, «Севкаврентген», «Баксан-Автозапчасть», «Гласс», «Бетанет» эмда башхала къатышадыла. Продукцияны тыш рыноклагъа ётдюрюр, республиканы промышленность предприятиялары къырал болушлукъ алырча этер, сатыу-алыу-экономика байламлыкъланы кенгертир эмда инвестицияланы кёбейтир муратда Россейли экспорт ара, Россей Федерацияны тыш къыраллада сатыу-алыу представительстволары  бла бирге ишлеу къуралгъанды.