Шабат кюн Къабарты-Малкъар къырал университетде Жаш профессионалланы (WorldSkills Рussia) ючюнчю регион чемпионаты жабылгъанды. Анга аталгъан къууанчлы жыйылыугъа КъМР-ни Башчысыны къуллугъун болжаллы халда толтургъан Казбек Коков, КъМР-де Баш федерал инспектор Евгений Ткачев, РФ-ни Къырал Думасыны депутаты Геккиланы Заур, КъМР-ни Парламентини бла Правительствосуну, министерстволаны бла ведомстволаны башчылары къатышхандыла.
Ол башланырдан алгъа уа, къонакъла окъуу юйню кенг коридорунда къуралгъан кёрмючге къарагъандыла. Анда шёндюгю модагъа кёре тигилген жыйрыкълагъа, хунерлиле жыйгъан роботлагъа, ашха устала хазырлагъан миллет ашарыкълагъа, башха затлагъа да уллу эс бургъандыла. Агъач усталадан бири уа Казбек Валерьевични кеси ишлеген суратын аны кесине бергенди.
Залда уа къызыл, жашил, сары, акъ энчи кийимлери бла жаш професионалла олтурадыла. Къонакъла да ары келедиле. Андан сора чемпионатны байрагъы кийириледи. Анга жыйылгъанла, ёрге туруп, толкъун къарсла бла тюбегендиле. Байракъ космосда, жыйырма къыралда да болгъанды. 2018 жылны август айында уа Россейге берилгенди. Аны 18 шахарында болуп, Къабарты-Малкъаргъа жетгенди.
Ызы бла Казбек Коков конкурсну республикалы кесегине чыкъгъанланы бла хорлагъанланы алгъышлагъанды. РФ-ни Президенти Владимир Путин Федерал Жыйылыугъа Посланиясында WorldSkills къымылдаугъа уллу магъана бергенин, аны сынауун ишчи усталыкъны даражасын кётюрюуде, башламчылыкъла, жангылычла этерге талпыннган специалистле хазырлауда, ол санда профессионал билим бериуню жангыртыуда да, кенг хайырланыргъа кереклисин энчи чертип айтханын эсге салгъанды.
-Бизни республикада да ол кесине тийишли жер тапханы къууандырады. Бу жолгъу регион чемпионатха къатышханла 18 бек керекли усталыкълагъа кёре эришгендиле. Аланы араларында уа юниорла, жаш специалистле кибик, сынаулу устазла-юйретиучюле да болгъандыла. Жаш тёлюбюз республикабызны хазнасыды, аны хунерлигин андан ары айнытыр ючюн къолубуздан келгенни аярыкъ тюйюлбюз,-дегенди КъМР-ни оноучусу.
Казбек Коков кёп да бармай «Билим бериу» миллет проектни чеклеринде келир заманлада бютюн бек сураллыкъ ишчи усталыкълагъа юйретиу жаны бла ара ачыллыгъын эмда WorldSkills-ни стандартларына бла шёндюгю заманны излемлерине кёре эллиден аслам мастерской къураллыгъын билдиргенди. Сора жаш тёлюню ол онгланы хайырланыргъа, артха къарамай, алгъа – муратларына- таукел барыргъа, туугъан Къабарты-Малкъарыбызны бла Ата журтубузну айныуларына себеплик этерге чакъыргъанды.
Регионну оноучусу дагъыда «Келир заманнга билет», «Мени биринчи бизнесим», «Мен – профессионалма», «Россейни лидерлери», «Жангы бийиклик» эмда къыйматлылыкъларын кёргюзтген аллай башха проектле да андан ары жашауда бардырыллыкъларына ышандыргъанды.
Чемпионатны баш директоруну атындан конкурсантланы бла къонакъланы WorldSkills-ни регион программаларыны таматасыны орунбасары Людмила Иванюк алгъышлагъанды. «Мен бу халкъла аралы къымылдауну байрагъын келтириуге къатышханым ючюн кесими насыплыгъа санайма»,-дегенди эмда экспертлеге бла къураучулагъа жюрек ыразылыгъын билдиргенди.
Андан сора хорлагъанланы саугъалау башланнганды. Тюрлю-тюрлю компетенциялада алтын, кюмюш эмда доммакъ майдалла, дипломла, ахча саугъала алгъанлагъа аланы КъМР-ни Парламентини Председатели Татьяна Егорова, Геккиланы Заур, Евгений Ткачев,КъМКъУ-ну бла КъМКъАУ-ну ректорлары Юрий Альтудов бла Аслан Апажев, Нальчик шахар округну администрациясыны башчысы Таймураз Ахохов, Урунуу махтаулукъну эки орденини иеси Залимхан Мирзаканов бергендиле. Саугъаланнганланы араларында Кючмезланы Радима, Гергъокъланы Мухаммат, Черкесланы Жулдуз, Курданланы Жамиля, Тамбийланы Мадина болгъандыла.
Шимал-Осетия Аланияда республикада WorldSkills къымылдауну координация арасыны башчысы Мавланов Алан а Кючмезланы Радиманы дюгер хычинлени уста этгени ючюн энчи саугъалагъанды, алай конкурсха къатышхан башхаланы да къуру къоймагъанды.
Концерт программа да бек сейир болгъанды. Анга уа КъМР-ни сыйлы артисти Текуланы Амур, Татьяна Третьяк, Тимур Лосанов, "Бзэрабзэ" къауум, "Кабардинка" къырал академиялы тепсеу ансамбль, "Амикс", "Жилтинчикле" жыр-тепсеу ансамбльле да юлюшлерин къошхандыла.
