КъМР-ни Парламентини президиумуну кезиулю жыйылыуунда «правительстволу сагъатны» чеклеринде КъМР-де волонтёрланы жылы къалай бардырылгъаныны эсеплери сюзюлгендиле.
Ала бла жыйылгъанланы жарыкъландырыу, илму эм жаш тёлюню ишлери жаны бла министрни орунбасары Мокъаланы Ачемез шагъырей этгенди. Аны айтханына кёре, 2018 жылда КъМР-ни Башчысында добровольчествону соруулары жаны бла совет къуралгъанды, дагъыда Волонтёрланы жылына хазырланыу эм бардырыу комитет да ишлегенди.
Бюгюнлюкде уа республикада бу къымылдаугъа къатышханланы саны 8600 адамдан 18140-гъа дери ёсгенди. Аланы 94 проценти школчула бла студентледиле.
Былтыр республиканы бюджетинден добровольчествону айнытыугъа 454 минг сом къоратылгъанды. Граждан обществону институтлары бла байламлыкъла эм динлени ишлери жаны бла министерство уа коммерциялы болмагъан организацияланы арасындан конкурсну чеклеринде эки волонтёр организациягъа 500-шер минг сом бёлгенди.
- «Билим бериу» миллет проектни «Социал тирилик» федерал конкурсуна берилген заявкаланы сюзюп, республикагъа софинансирование амал бла 8 миллион сом бёлюннгенди,-деп къошханды докладчы.
Волонтёрланы хайырындан а былтыр адамланы социал жумушларын тамамлагъан организациялада 530 жандауурлукъ иш бардырылгъанды, аскерчилени хурметине ишленнген 248 эсгертме бла къарындаш къабырла жангыртылгъандыла, 23 мингнге жууукъ терек салыннганды, къаугъалы болумланы тохтатыугъа аталгъан 5 юйрениу къуралгъанды.
Республиканы волонтёрлары къыралны субъектлеринде тюрлю-тюрлю жыйылыуланы бардырыргъа да болушхандыла. Ол санда футболдан дунияны FIFA-2018 эмда Каспийск шахарда тутушуудан Европаны чемпионатларын, «Жаш устала» эришиулени республикада бёлюмюн эм башхаланы. Битеу да бирге уа былтыр 1920 тюрлю-тюрлю жыйылыу, тюбешиу бардырылгъанды, алагъа 5 мингден аслам волонтёр къатышханды.
Сёз «Россейни доброволецлери» деген бирикдирилген информация системаны ишин тирилтиуню юсюнден да баргъанды. Бюгюнлюкде уа анда эсепде 164 организация бла 763 волонтёр турадыла. Мындан ары къаллай жумушла толтурургъа белгиленнгенини юсюнден айта, Мокъаланы Ачемез саулукъ сакълауда, ёсюп келген тёлюню патриот ниетледе юйретиуде, тёгерекдеги къудуретни сакълауда волонтёр къымылдауланы онгларын хайырланыргъа белгиленнгенин чертгенди.
Докладны сюзе. Парламентни спикери Татьяна Егорова волонтёрлукъну тёрелери республикада, къыралда да терен болгъанларын айтханды. Ол аланы онгларын паллиатив болушлукъ бериуде хайырланыргъа кереклисине эс бургъанды.
- Ол жаны бла арала битеу къыралда бардыла, ол санда бизде да. Сынаулары болгъан волонтёрланы бу ишге тартыргъа керекди. Ала уа, медицина болушлукъ бергенден сора да, саусузланы кёллерин жарыкъ этерге, алай бла уа жашауларын созаргъа боллукъдула,-дегенди спикер.
Парламентни Культура, граждан обществону институтларын айнытыу эм асламлы информация органла эмда Билим бериу, илму эм жаш тёлю политика жаны бла комитетлени башчылары Борис Паштов бла Светлана Азикова да волонтёрла бардыргъан ишге бийик багъа бергендиле эмда Жарыкъландырыу, илму эм жаш тёлюню ишлери жаны бла министерствону къыйыны уллу болгъанын чертип, ыразылыкъларын айтхандыла.
Жыйылыуда этилген предложенияла эсгертиулеге кийирилгендиле.
