КъМР-ни Парламентини кезиулю пленар жыйылыуунда комитетлени къауумларына тюрлениуле кийирилгендиле, РФ-ни Къырал Думасына башламчылыкъла да къабыл этилгендиле. Кенгешни спикер Татьяна Егорова бардыргъанды. Бек алгъа ол Джамбулат Эркеновха эркин болгъан депутат мандат берилгенин билдирип, аны алгъышлагъанды.
Биринчиден, Парламентни къауумунда болгъан тюрлениуле сюзюлгендиле. Джамбулат Эркеновдан Промышленность, транспорт, связь эм жол мюлк, Регламент, депутат этика эм Парламентни ишин къурау жаны бла комитетлеге кийириуню юсюнден тилек берилгенди.
Законла чыгъарыучу органны контроль-эсеплеучю комиссиясыны таматасы болуп тургъан Маремуков Арсен Аминовични депутат полномочиялары ол ёлгени бла байламлы болжалдан алгъа тохтатылгъанлары ючюн Регламент, депутат этика эм Парламентни ишин къурау комитетни башчысы Кансаланы Елена аны къуллугъуна Тимур Тхагалегов тийишли кёрюлгенин билдиргенди.
Депутатла Светлана Баунну Май район сюдню 1-чи номерли участкасыны жарашдырыучу судьясына къабыл кёргендиле. Ызы бла законланы проектлерин сюзюуге киришгендиле. «КъМР-ни бюджетини дефицитини бир кесегин къайтарыр ючюн федерал бюджетден кредит бериуню юсюнден документге къошакъ келишимни къабыл кёрюуню юсюнден» законну проекти эки окъулууда къабыл кёрюлгенди.
КъМР-ни финансла министрини къуллугъун толтургъан Елена Лисун ангылатханнга кёре, документ субъектлеге берилген бюджет кредитлени реструктуризациясыны жорукълары тюрленнгенлери эмда РФ-ни Финансла министерствосу бла жангы келишимге къол салыннганы бла байламлы жарашдырылгъанды. Къошакъ да уа борчну къайтарыуну болжаллары сакъланмасала, къаллай тазир салынырыгъы, аны ёлчеми да белгиленипдиле.
«Таксиде пассажирлени эм жюклени жюрютюу жаны бла жумушлагъа контрольну тамамлауну низамыны юсюнден» республикалы законнга да, кёргюзтюлген тюзетиулеге да, къаралгъанды. КъМР-ни Правительствосуну башчысыны орунбасары - инфраструктура эм цифралы айныуну министри Владимир Болотоков тюрлениуле документлени электрон халда жюрютюуню къурау бла байламлы болгъанларын айтханды. Дагъыда таксилени ишлерине контрольну толтурууну низамы да алышыннганды.
Федерал законлагъа этилген тюрлениулеге тийишлиликде жашау журт контроль ючюн жууаплы органлагъа кёп къатлы юйледе отоуланы бузуп, жангыдан ишлеуню жорукъларын сакъламагъанланы ачыкълау жаны бла полномочияла къошулгъандыла. Аны бла байламлы «КъМР-де жашау журт жорукъланы бир низамгъа келтириуню юсюнден» законнга тюзетиуле этилгендиле.
Социал политика, урунуу эм саулукъ сакълау комитетни башчысы Хусейн Кажаров а «Инсанланы саулукъларын сакълауну юсюнден» законну 2-чи статьясына кийирилген жангычылыкъланы кёргюзтгенди. Алагъа кёре толтуруучу власть органланы медицина болушлукъну айнытыуну полномочиялары кенгертиледиле. Проект эки окъулууда къабыл кёрюлгенди.
Парламентни Законодательство, къырал къурулуш эм жер-жерли самоуправление жаны бла комитетини депутатлары федерал законланы проектлерин хазырлагъандыла, ала жууукъ кезиуде РФ-ни Къырал Думасына кёргюзтюллюкдюле.
Кенгешге федерал инспектор Евгений Ткачев, РФ-ни Федерал жыйылыуунда республиканы келечиси Улбашланы Мухарбий, Жамауат палатаны таматасы Хазратали Бердов, Конституциялы сюдню башчысы Геляхланы Абдуллах, Адамны эркинликлери жаны бла уполномоченный Зумакъулланы Борис эм башхала да къатышхандыла.
Тикаланы Фатима.