КъМР-ни Башчысыны къуллугъун болжаллы халда толтургъан К.В.Коков Терроризмге къажау республикалы комиссияны жыйылыуун бардыргъанды. Анга КъМР-ни Парламентини Председатели Т.Б.Егорова, КъМР-ни Правительствосуну Председатели Мусукланы А.Т., КъМР-де федерал инспектор Т.Э.Макоев, право низамны сакълаучу структураланы, министерстволаны бла ведомстволаны, жер-жерли самоуправленияны органларыны таматалары да къатышхандыла.
Кенгешде сёз транспорт объектлени бла бу бёлюмню инфраструктурасын аманлыкъ ишледен къоруулауну, бизни адамларыбыз террористлени халкъла аралы  биригиулерине къатышмазча профилактика мадарла этиуню, толтуруучу власть органлада бла жер-жерли самоуправленияны органларында ишлегенлени  терроризмге къажау кюрешни бардырыргъа профессионал халда  хазырлауну юсюнден баргъанды. Республиканы оноучусу жаш адамланы араларында радикал ниетле жайылмазларына бютюн уллу эс бурургъа, ол жаны бла мадарланы кючлендирирге керек болгъанын айырып айтханды.
Комиссияны жыйылыуунда КъМР-ни Правительствосуну Председателини орунбасары – инфраструктура эмда цифралы айныуну министри В.Х.Болотоков, Транспорт бла байламлы ишлеге надзор этген федерал службаны Шимал-Кавказ федерал округда регионла аралы жер-жерли управлениясыны таматасыны къуллугъун болжаллы халда толтургъан В.Х.Коготыжев, Къабарты-Малкъар Республиканы министри З.К.Кашироков, Нальчик шахар округну жер-жерли администрациясыны башчысы Т.Б.Ахохов, Бахсан эмда Черек районланы жер-жерли администрацияларыны башчылары А.Х.Балкизов бла Муртазланы Б.С., КъМР-ни  жарыкъландырыу, илму эмда жаш тёлюню ишлери жаны бла министрини орунбасары Мокъаланы А.М. сёлешгендиле.
Жыйылыу битеу анда айтылгъан оюмланы бла эсгертиулени эсге алыу бла жарашдырылгъан бегимни къабыл кёрюу бла бошалгъанды.