КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек иджыблагъэ Шэджэм районыр къызэхикIухьащ. Псом япэу ар къыщыувыIащ Эль-Тюбю къуажэм икIи абы дэт фельдшер-акушер пунктым еплъащ. Мы IуэхущIапIэр цIыху 270-м щIигъум я узыншагъэм кIэлъоплъ. Пэшхэр зыхуеину Iэмэпсымэхэмрэ аппаратурэмкIэ къызэгъэпэщащ, тэмэму ягъэплъ, псы щIыIэри хуабэри яIэщ. Санитар автотранспортыр къэгъэщIэрэщIэжынымкIэ программэм хиубыдэу абы къратащ бгылъэ щIыпIэхэм медицинэ дэIэпыкъуныгъэ псынщIэ къыщызэгъэпэщыным хуэщIа машинэ.
КIуэкIуэ Казбек апхуэдэу еплъащ гъэ къэс турист куэд здэкIуэ щIыпIэхэм - «Къайсын ухуэзышэ лъэбакъуищэ» мемориалымрэ КъБР-м и цIыхубэ усакIуэ Кулиев Къайсын къыщалъхуа унэмрэ, мы тхыдэ-этнографие комплексым зегъэужьынымкIэ лэжьыпхъэхэм теухуауэ бысымхэм жаIахэм хэплъащ.
Республикэм и унафэщIыр Булунгу къуажэм Шахмурзаев Сэхьид и цIэр зэрихьэу дэт курыт школым еплъащ. Абы псори зэхэту сабийуэ 139-рэ къокIуалIэ, абыхэм ящыщу 26-м я ныбжьыр школ щIэтIысхьэгъуэм нэсакъыми, мыбы хэт садым щыIэщ.
Къуажэм щылэжьын хуейхэм ящыщу республикэм и унафэщIым къыхигъэщхьэхукIащ гъуэгур егъэфIэкIуэныр, абы екIуалIэ маршрутым транспорт тегъэувэныр, жьы хъуа щэнхабзэ IуэхущIапIэм и пIэкIэ апхуэдэ унэщIэ къуажэм дэщIыхьыныр 2019 гъэм и планым хэгъэхьэн зэрыхуейр.
Хъущтэ-Сырт къуажэм КIуэкIуэ Казбек щеплъащ абы дэт фельдшер-акушер пунктым, апхуэдэу «Урысей зэкъуэтым» и парт проектым ипкъ иткIэ цIыху 300 щIэхуэу 2018 гъэм къызэIуаха щэнхабзэмкIэ унэм.
Шэджэм Ищхъэрэ къуажэм нэса иужь КIуэкIуэ Казбек щэнхабзэмкIэ унэм еплъащ, апхуэдэу къуажэ унафэщIхэм ящIыгъуу тепсэлъыхьащ дохутыр амбулаторэр къызэхуэтыншэу зэгъэпэщыжын, абы и щхьэмрэ инженер коммуникацэхэмрэ зэхъуэкIын, пщIантIэр зэIузэпэщ щIын зэрыхуейм.
КъБР-м и Iэтащхьэм и къалэнхэр пIалъэкIэ зыгъэзащIэр апхуэдэу еплъащ Шэджэм Ищхъэрэ - Бедык хъупIэ автомобиль гъуэгум хиубыдэу зэрагъэпэщыжа лъэмыжым. Ар къуажэм и кум хуозэ. Лъэмыжым и щIэгъэкъуэнхэр зэрытIысам къыхэкIыу ущызекIуэну шынагъуэ хъуати, зэхуащIри ар зыхуей хуагъэзащ.
Лашынкъей къуажэм КIуэкIуэ Казбек щеплъащ щэнхабзэм, узыншагъэр хъумэным пыщIа IуэхущIапIэ зыбжанэм, апхуэдэу Къуэныкъуей Назир и цIэр зезыхьэ курыт школ №1-м. Ар зы сменэу мэлажьэ икIи еджакIуэ 350-рэ къокIуалIэ. Абы къедза сабий садым зыхуей хуэзэу я махуэр щагъакIуэ цIыкIу 81-м. Республикэм и Iэтащхьэмрэ педагогхэмрэ щызэпсалъэм къаIэтащ мы IуэхущIапIэм псоми я зэхуэсыпIэ пэш, спортзал, шхапIэ зыхэт Iыхьэ къыгуэщIыхьыпхъэу зэрыщытыр.
Шэджэм ЕтIуанэ къуажэм дэт курыт еджапIэ №1-м, курыт еджапIэ №3-м къыгуэт сабий садым, предмет щхьэхуэхэр нэхъ куууэ щрагъэджу Шэджэм къалэм дэт курыт еджапIэ №1-м еплъа нэужь республикэм и Iэтащхьэм къыхигъэщхьэхукIащ а IуэхущIапIэхэм къыхагъэхъуэн, зи школ кIуэгъуэ мыхъуа сабийхэр зэкIуэ- лIэн садхэмрэ яслъэхэмрэ ящIын зэрыхуейр.
КъБР-м и Iэтащхьэм и къалэнхэр пIалъэкIэ зыгъэзащIэр апхуэдэу щыIащ сабийхэмрэ ныбжьыщIэхэмрэ папщIэ Шэджэм къалэм дэт спорт IуэхущIапIэм. Мыбы щIалэгъуалэр баскетболым, волейболым, шахматым, дзюдом, атлетикэ хьэлъэм, псы есыкIэм щыхуагъасэ, футбол джэгупIэ хэтщ. 2018 гъэм яухуэри къызэIуахащ спорт бэнэкIэхэм щыхуагъасэ пэш щхьэхуэ, цIыхуи 150-м ятещIыхьауэ.
Зэплъа жылагъуэхэмрэ IуэхущIапIэхэмрэ щызэфIэгъэкIын хуейхэм япкъ иткIэ Шэджэм районым и унафэщIхэм хуагъэуващ муниципальнэ щIыналъэхэм я социально-экономикэ зыужьыныгъэр щIэгъэхуэб-жьэнымкIэ, жылагъуэхэр зэIузэпэщ щIынымкIэ, социальнэ инфраструктурэм и IуэхущIапIэу иджыпсту яухуэхэр нэгъэсыжынымкIэ, инженер сетхэр, гъуэгухэр къэгъэщIэрэщIэжынымкIэ, цIыхухэр зэблэу къыхэмыкIыу газкIэ, псыкIэ къызэгъэпэщынымкIэ лэжьыпхъэ-хэр.