23 февральда Нальчикни солуу паркында «Ёмюрлюк от» мемориалны тийресинде халкъ кёп жыйылгъан эди. Ол кюн Ата журтубузну жалынчакъсызлыгъы, эркинлиги ючюн жанларын берген аскерчилеге баш урургъа келгенлени арасында КъМР-ни Башчысыны къуллугъун  болжаллы халда толтургъан Казбек Коков, Парламентни спикери Татьяна Егорова, баш федерал инспектор Евгений Ткачев, Правительствону таматасы Мусукланы Алий, министрле, депутатла, ветеран эм жамауат организацияланы келечилери, право низамны сакълаучула, жаш тёлю да бар эдиле.
Ата журтну къоруулаучуну кюню къыралыбызны, аны халкъыны эркинлиги, мамырлыкъ ючюн кеслерин аямагъан аскерчилени атлары ёмюрлюк этилгенини белгисиди. Ол кюн да жыйылгъанла аланы хурметине бир минут шумсуз тургъандыла. Ызы бла мемориалгъа гюлле салгъандыла.