Алгъаракълада Къабарты-Малкъарны къырал аграр университети бла Тюркню Ризе шахарында Реджеп Тайип Эрдоганны атын жюрютген къырал университет арада байламлыкъ жюрютюуню юсюнден келишим этгендиле, деп билдиредиле КъМКъАУ-ну пресс-службасындан.
Бу магъаналы иш вузланы башчылары бла студентлерини, Нальчик шахарны Тюрк Республикада дайым келечиси Апполаны Асланны эм КъМКъАУ-ну ректору Аслан Апажевни себепликлери эм къатышыулары бла бола тургъан тюбешиулерини хайырындан тамамланнганды. Къыралланы арасында экономика, маданият эм билим бериу жаны бла байламлыкъла айный барадыла, ол себепден окъуу юйле да бирге конференцияла, семинарла эм курсла бардырыргъа келишгендиле.
Студентле, аспирантла эм стажёрла да сайлагъан усталыкъларына кёре бир бирге барып окъурча, практиканы ётерча онгла къураллыкъдыла. Аланы къаллай бирин эм къайсы усталыкълагъа алыргъа кереклисин а вузла кеслери белгилерикдиле.
Аны бла бирге педагогланы хазырлауда, билимлерин ёсдюрюуде да бирге ишлер умут барды. Келишимге кёре, илму жаны бла академиялы байламлыкъла да кючленирикдиле, ол санда диплом алгъандан сора билимни ёсдюрюрге онг боллукъду. Андан сора да, илму-техника тинтиуле жаны бла жангылычылыкъланы юслеринден бир бирге билдирирге, халкъла аралы проектле, конференцияла, симпозиумла, кёрмючле къураргъа белгиленеди. Къошакъ билим бериуге, чыгъармачылыкъ конкурсла, тематикалы олимпиадала бла спартакиадала бардырыугъа, бирге солургъа мадарла этиуге энчи эс бурулады.
Биринчи келишим беш жылгъа этилгенди. Документде айтылгъаннга кёре, арада байламлыкъ Россейни бла Тюркню законодательстволарына тийишлиликде къураллыкъды.
