Нальчик шахар округну администрациясыны башчысы Таймураз Ахохов алгъаракъда мэрияда бардырылгъан жамауат сюзюулеге къатышхан талай адам бла тюбешгенди. Сёз анда шахарда Шортанов, Карашаев, Ленин эм Къулий улу атлы орамла бла чекленнген тийрени тапландырыуну юсюнден баргъанды, деп билдиргендиле администрацияны пресс-службасындан.

Белгилисича, алгъаракълада администрацияда ётген жыйылыуда Къулий улу атлы проспектде жашагъан бир талай адам ол тийрени планировкасын дурус кёрмегенлерин билдиргендиле. Шёндю орналгъан гаражланы кетерип, алайда кёп фатарлы юй ишлеуню юсюнден оноугъа къажау сюелгендиле. Алай мэрияда айтханларына кёре, ол участокда 50 чакълы гараж эркинликсиз турадыла. Башхача айтханда, ала муниципалитетни жеринде законсуз ишленнгендиле.

Гаражланы иелерини бир кесеги уа, ала оюм этгенден, азлыкъда къалгъанлары себепли жамауат сюзюуге къатышыргъа унамагъандыла. Ызы бла шахарны администрациясыны башчысына бу жумушха ала бла энчи тюбешип къарарын тилегендиле.

Мэр бла тюбешгенлеринде, ол сюзюулени тюзге санамагъанларын ачыкъ айтхандыла. Кеси жанындан Таймураз Ахохов ол жер-жерли администрацияны быллай ишлени бардырыу жаны бла жоругъуна тийишлиликде ётгенин белгилегенди, алай анда хар не да тап болмагъанын тюзге санап, къол кётюрюуге, бек биринчиден, ол районда жашагъанла къатышыргъа керек болгъанларын чертгенди. Администрацияны ишчилерине да башха регионлада бу жаны бла сынамны тинтирге эмда жорукълагъа анга кёре тюрлениуле сингдирирге буйрукъ бергенди.

Къалай-алай болса да, ол участокда болумну, ол санда бирле муниципалитетни жерин бийлеп, анда гаражла ишлегенлерин, мэр тюзге санамагъанды. Аны къой, ол тийре кеси да ушагъыусуз, тизгинсиз кёрюннгенин эсгертгенди. Шахарны ара районунда аллай затланы къояргъа жарамайды, деп белгилегенди ол.

Тюбешиуню ахырында комиссиягъа, адамланы бла юйню ишлерикни да къошуп, болумну терен тинтип, ахыр оюмну хазырларгъа буйрукъ берилгенди. Шахарны башчысы уа анга кёре тийишли оноу этерикди, дегендиле мэрияда.