Бу кюнледе Россейни Промышленность эм сатыу-алыу министрини орунбасары Виктор Евтухов «Россейская газетагъа» берген интервьюсунда къыралны шахарларыны орамларында сатыу-алыу чатырланы бла ларёкланы орнатыргъа кереклисин айтханды. Аны оюмуна кёре, бизде ол жаны бла хал бек осалды.

Политик билдиргенича, европалы къыраллада бу жумушха бек жууаплы къарайдыла. Россейде уа тюкенчиклени саны эки кереге азды. Аллай тюрлю сатыу а бек магъаналыды экономикагъа.

Быллай жангылыкъны юсюнден биз Нальчик шахарны администрациясыны оюмун билирге сюйгенбиз. Нек дегенде бир талай жыл мындан алгъа республиканы ара шахарыны орамларындан газет киоскланы окъуна кетерген эдиле. Нальчикни администрациясыны экономика департаментини таматасы Анзор Битохов бизге билдиргенине кёре, бюгюнлюкде шахарда аллай сатыу-алыу чатырла кёпдюле. «Аланы ара орамлада орнатыу аланы ушагъыусуз этерикди. Болсада шёндю биз газет киоскланы къайтарыр муратлыбыз эм ол жумуш бла кюреше турабыз», - дегенди ол.