Бирикген кёрмючде - республиканы агропромышленностуну продукциясы, туризмни бийик даражагъа жетдириуню онгларыСочиде 14 февральда Олимпиадалы паркны баш медиаарасында Россейли инвестиция форум ачылгъанды. Ол РФ-ни Правительствосуну Председатели Дмитрий Медведевни къатышыуу бла барады. Аны баш темасы - миллет проектлени толтурууду. Форумну «Росконгресс» фонд РФ-ни Правительствосуну себеплиги бла къурагъанды. Анга, тёреде болгъаныча, уллу ата журтлу эмда тыш къыраллы компанияланы башчылары, россейли губернаторла, алимле бла бизнесменле къатышадыла. Къабарты-Малкъардан форумгъа республиканы Башчысыны къуллугъун болжаллы халда толтургъан Казбек Коковну тамата даражалы делегация баргъанды. Анга законла чыгъарыучу, толтуруучу власть органла, муниципал къуралыуланы оноучулары, бизнесменле да киредиле. РФ-ни Шимал Кавказны ишлери жаны бла министерствосу бла СКФО-ну субъектлери къурагъан бир экспозицияда бизни республика белгили агропромышленность предприятияла чыгъаргъан продукциясын кёргюзтеди. Андан сора да, кёрмючге келгенле регионну экономика эмда инвестиция онглары, КъМР-де туризм-рекреация кластерни айнытыу, ол санда Черек районда тау-лыжа курорт, 400 жерге туркомплекс къурау, Элбрусну шимал жанында туризм бла байламлы инфраструктураны къурулушун бардырыу, «Жылы-Суу» кемпинг-парк ачыу, саулукъну кючлендирген туризмни кенгертиу эмда санаторий-курорт комплексни ырысхы-техника онгларын игилендириу жаны бла проектле бла шагъырейленедиле.
Поделиться: ЧИТАТЬ ТАКЖЕ:
|