КъБР- м и Iэтащхьэ КIуэкIуэ Казбекрэ «Зэчиймрэ ехъулIэныгъэмрэ» щIэныгъэ фондым и унафэщI, «ЩIэныгъэ» лъэпкъ проектым и Жылагъуэ-гъэзэщIакIуэ советым и унафэщI Шмелёвэ Еленэрэ ирагъэкIуэкIащ Гъуазджэм, спортым, егъэджэныгъэмрэ щIэ­ныгъэмрэ зэфIэкI къыщызыгъэ­лъагъуэ сабийхэм зегъэужьыным хуэгъэпсауэ КъБР-м щылажьэ «Антарес» щIыналъэ центрым и Попечительскэ советым и зи чэзу зэIущIэр. 

ЗэIущIэм хэтащ УФ-м и Къэрал Думэм и депутатхэу Геккиев Заур, Родинэ Викторие, КъБР-м и Парламентым и УнафэщIым и къуэдзэ Къардэн Мурат, КъБР-м и Парламентым ЕгъэджэныгъэмкIэ и комитетым и унафэщI Емуз Нинэ, КъБР-м и Парламентым и депутат, «Налшык» хьэлвэ къыщыщIагъэкI заводым и генеральнэ директор Къудали Му­хьэмэд, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м егъэджэныгъэмкIэ, щIэныгъэмрэ щIалэгъуалэм я IуэхухэмкIэ и министр Езауэ Анзор; Налшык къалэм и администрацэм и унафэщI Ахъуэхъу Таймураз, ХъумапIэ банкым и Къэбэрдей-Балъкъэр къудамэм и унафэщI Бейтыгъуэн ­Залинэ, Бгылъэ щIыпIэхэр джыным елэжь институтым и унафэщI Бек­киев Мухътар, Кавказ щIалэгъуа­-   лэм зыщагъасэ тренинг центрым и унафэщI Борисевич Екатеринэ, Э­ксперт советым щыщ, КъБКъУ-м Компьютер IэмэпсымэхэмкIэ и ­кафедрэм и профессор Хьэшыр      Татьянэ, видеоконференц IэмалкIэ - «Ай Ти Ви Групп» IуэхущIапIэм и унафэщI Алтуев Мурат, «Кавказ. РФ» IуэхущIапIэм и генеральнэ директор ТIымыжь Хьэсэн сымэ. 
ЗэIущIэр къыщызэIуихым, КъБР-м и Iэтащхьэ КIуэкIэ Казбек и псалъэм къыщыхигъэщащ «Антарес»-р республикэм дежкIэ мыхьэнэшхуэ зиIэ проекту зэрыщытыр.
Центрыр «Дэтхэнэ сабийми и ехъу­лIэныгъэ» федеральнэ проектым ипкъ иткIэ 2019 гъэм къызэIуахауэ щытащ. 
«Ар къызэдгъэпэщыным мыхьэ­нэшхуэ етту делIэлIащ, унафэщI къэс езым и гуащIэ Iуэхум хилъхьащ схужыIэнущ. Сэ езым егъэджэныгъэм епха унафэхэр си нэIэ щIэтащ. Центрыр Налшык и курорт Iыхьэм хиубыдэ сабий санаторэм зэрыщыIэм и фIыгъэкIэ, республикэм ис сабийхэм къалъыс IуэхущIапIэр езыхэм къагъэсэбэпыну хуит хъужахэщ, иджы нэгъуэщI IэмалкIэ. Ар къызэIуихын папщIэ республикэм къыхуаутIыпщауэ щытащ сом мелуан 213-м ­щIигъу, щIыналъэм и бюджетым щыщи текIуэдащ. Аращи, нобэ Центрым лэжьыгъэшхуэ зэфIегъэкI ди сабийхэм ябгъэдэлъ зэчийхэр наIуэ къэщIыным, къыдалъхуа зэфIэкIым зегъэужьыным теухуауэ. Ар Урысейм и Президент Путин Владимир ди ­пащхьэ къригъэува къалэнхэм ящыщщ», - жиIащ КIуэкIуэ Казбек.
Шмелёвэ Еленэ къызэхуэсахэм сэлам яриха нэужь, Къэбэрдей-Балъкъэрым егъэджэныгъэм къыдэкIуэу сабийхэм ират щIэныгъэм зыщрагъэужьын папщIэ куэд зэращыхузэ­фIэкIыр жиIащ. А лъэныкъуэмкIэ къалэн нэхъыщхьэу дяпэкIи щытынур «сабийхэм заузэщIыну Iэмал псори етынырщ, сыту жыпIэмэ, инфраструктурэ зы­зыубгъуамрэ IэщIагъэм хэзы­щIыкI лэжьакIуэхэмрэ сыт щыгъуи щIэупщIэшхуэ яIэнущ». 
«Къэрал программэм псори хиубыдэн папщIэ, республикэм и щIыналъэ псоми зэхуэдэ Iэмал ефтыныр япэ зэривгъэщыр хэкIыпIэ пэжу къэв­гъуэтащ. Иджыпсту мы щIыналъэ центрым зэфIигъэкI лэжьыгъэхэр «Сириус» IуэхущIапIэм щапхъэ трихыурэщ зэрищIэр, ди лэжьэгъухэм ­кърат чэнджэщхэм едаIуэурэ. Ар фызылъэIэсыпхъэ мурадым хуэм-хуэмурэ фызэрыхуэкIуэм и щыхьэтщ, сабийхэри фэри хъарзынэу фыхэгъуэзащ а Iуэхум. IэщIагъэлIхэр я акъыл зэтехуэу зэрызэдэлажьэр щы­плъагъукIэ, уи фIэщ мэхъу центрым и унафэщIхэр къыхэзыхахэр зэрыщымыуари, хэкIыпIэу къагъуэтахэр псоми я зэхуэдэ бгъэдыхьэкIэ пэжу зэры­щыт­ри», - жиIащ Шмелёвэ Еленэ.
КIуэкIуэ Казбек Шмелёвэ Еленэ фIыщIэ хуищIащ лэжьыгъэр къазэрыдиIыгъым, къы­дэкIуэтей щIэблэми, егъэджэн Iуэхум хэпщIахэми мыхьэнэш­хуэ зиIэ лэжьыгъэшхуэ зэ­радригъэкIуэкIым щхьэкIэ. 
«Шэч хэмылъу, абыхэм къалэжь пщIэшхуэ яхуэпщIыну. Нобэ ар зыщIыпIэ нэсыфа, дызыгъэгуфIэ ди сабийхэм ядэтлъагъум къыдгурегъаIуэ икIи Iэмал имыIэу а лэжьыгъэм нэхъ куужу зедгъэужьынущ. Ди щIыналъэм сыт нэхъри нэхъапэу къыщыдолъытэ сабийхэм щIэ­ныгъэ еттыныр. Аращ ди респуб­ликэм и къэкIуэнур зэ­лъытар», - жиIащ КIуэкIуэ Казбек. 
ЩIыналъэ центрым и лэжьыгъэр къипщытэжащ КъБР-м егъэджэныгъэмкIэ, щIэныгъэмрэ щIалэгъуалэм я Iуэху­хэмкIэ и министр Езауэ Анзор. Абы къыхигъэщащ лъэныкъуэ зэмылIэужьыгъуэхэмкIэ сабийхэм ябгъэдэлъ зэчийр къэгъэнэIуэнымрэ абыхэм зегъэужьынымрэ центрым иригъэкIуэкI лэжьыгъэ псоми я нэхъыщхьэу зэрыщытыр. 
«Зэчий зыбгъэдэлъ сабийхэмрэ щIалэгъуалэмрэ наIуэ къэщIыныр, абыхэм ядэлэжьэн Iуэхур республикэм щофIакIуэ. Центрым и фIыгъэкIэ ар нэхъ зэтеухуа, и ехъулIэныгъэхэри нэхъыбэ хъун хуейуэ аращ. А мурадым дылъэIэсын папщIэ, диIэ Iэмалхэр нэхъыфIу къэдгъэщхьэпэн, щIэныгъэ нэхъыщхьэ щызрагъэгъуэт еджапIэхэм, щIэныгъэ центрхэм, IэщIагъэм хуэзыгъэхьэзыр Iуэ­хущIапIэхэм нэхъыбэу ядэ­лэжьэн хуейуэ аращ», - дыщIигъуащ Езауэ Анзор. 
ЗэIущIэм къыщыпсэлъахэм къыхагъэщащ «Антарес»-р КъШР-м щыIэ, Инджыдж ЦIыкIу дэт РАН-м и астрофизикэ обсерваторием зэрыдэ­ла­жьэр; КъБР-м математикэ щIэ­ныгъэм зыщиужьын пап-щIэ, Адыгэ университетым и Кавказ математикэ центрым и ­гъусэу проект щхьэхуэм зэ­релэжьыр; 2020 - 2021 гъэхэм Къэбэрдей-Балъкъэрым щыщу сабий 29-рэ егъэджакIуэ 22-рэ я щIэныгъэм щыхагъэхъуа ­«Сириус» центрым пыщIауэ зэры­щытыр. 
«Антарес» центрым еубыд IэмэпсымэщIэхэмкIэ узэда лабораторэхэр зыхэт еджакIуэ корпус, абы хэтщ шахмат ущы­джэгу, музыкэм, сурэт щIыным зыщебгъасэ, литературэ хьэ­щIэщхэр. 
«Антарес»-м Iуэху хэхам хуэгъэпса егъэджэкIэ сменэрэ онлайн Iэмалымрэ щолажьэ, псори зэхэту абы зыхрагъэтхащ сабий 4800-м нэсым. Илъэс блэкIам абы и профильнэ сменэм щеджащ щIыналъэ щхьэ­хуэхэмрэ къалэхэмрэ щыщу еджакIуэ миным нэс. ЦIыху нэхъыбэ зыхэпщIа лэжьыгъэу «Антарес»-м иригъэкIуэкIахэм ящыщщ «Урысейр зэхуэдэ Iэмал къозыт къэралщ» зи фIэщыгъэ президент платформэм хыхьэ «Зыгъэпсэхугъуэ ин» проектыр. Абы хэтащ сабий мин I5-м нэс. Дызэрыт илъэсым и гъатхэпэм центрым щекIуэкIа «Хьэрш программэ «Сириус-2021» урысейпсо егъэ­джэ­ныгъэ сменэм хэпщIа хъуащ УФ-м и щIыпIэ 39-м щыщу сабии 130-рэ. 
Центрым лэжьэн зэрыщIи­дзэрэ, 5 - 11-нэ классхэм щIэс сабийхэм папщIэ сменэу 47-рэ ирагъэкIуэкIащ. Абыхэм къы­зэщIаубыдащ еджакIуэ 1784-рэ, онлайн IэмалкIэ - цIыху 785-рэ. Псори зэхэту зэхьэзэхуэ хэдэрыхэхым къызэщIиубыдащ еджакIуэ 20000. 
«Антарес» центрым и Эксперт советым и лэжьыгъэр ­къипщытэжащ Хьэшыр Татья­нэ. Ар тепсэлъыхьащ къыкIэ­лъыкIуэ илъэсым зыхуагъэувыж къалэнхэм. КъинэмыщIауэ, зэIущIэм зэхъуэкIыныгъэ щхьэхуэхэр хилъхьащ Попе­чительскэ советым и зэхэ­тыкIэм. 
«Антарес» щIыналъэ центрым и унафэщI Джаппуевэ Тамарэ тепсэлъыхьащ я лэжьыгъэм адэкIэ здиунэтIыну лъэ­ныкъуэхэм. КъыкIэлъыкIуэ илъэ­сым мурад зыхуащIыж рес­публикэм щекIуэкI Урысей­псо олимпиадэхэм я еджапIэ, щIыналъэ Iыхьэхэм тест IэмалкIэ узэрыхэтыну Iэмэпсымэхэр зэрагъэпэщыну. Ахэр бжыгъэр зи тегъэщIапIэ Iэмэпсымэхэр къагъэсэбэпу ирагъэкIуэкIынущ. КъинэмыщIауэ, 5 - 8-нэ классхэм щIэс сабийхэм пап­щIэ республикэ олимпиадэ ирагъэкIуэкIынущ сабий зэчиифIэхэр пасэу къыхацIыхукIын мурадкIэ. «А Iэмалхэм олимпиадэхэм къыщыхэжаныкIхэр къэтщIэну Iэмал къыдатынущ, «Антарес»-м и лэжьыгъэм хэтхэм я цIэ-унэцIэхэри нэхъыбэ хъунущ», - жиIащ Джаппуевэ Тамарэ. 
Мыпхуэдэ гупыж къыхалъ­хьащ: «Антарес» центрым иджыри «Кампус» - ущыжей ­хъуну къудамэ - къыгуащIыхьыну, щIыпIэ жыжьэ къикI еджа­кIуэхэр абы щIэсын хуэдэу. 
 КъБР-м и Iэтащхьэ КIуэкIуэ Казбек зэIущIэр щиухым къыхилъхьащ 2022 гъэм гъатхэпэм и 1-м и пэ къихуэу, егъэджэныгъэм къыдэкIуэу сабийхэм драгъэкIуэкI Iуэхухэм хагъэхъуэну, щIэныгъэм зезыгъэубгъу программэщIэхэм зрагъэукъуэдиину, профильнэ сменэхэм ящIэнухэр щаубзыхукIэ щэнхабзэмрэ спортымкIэ IуэхущIапIэхэм зыпащIэну, иджырей егъэджэныгъэ Iэмалхэм лъэ­щIыхьэ IэщIагъэлI щыIэн хуэдэу, егъэджакIуэхэм ядэлэ­жьэну.