Ветеранла жаш тёлюге насийхат айтхандылаАвтопробегге къатышханлагъа Къашхатауда жарыкъ тюбегендиле, деп билдиргендиле Черек районну жер-жерли администрациясыны пресс-службасындан. Анда афган урушда жоюлгъан аскерчилени намысына ишленнген эсгертмени аллында митинг да болгъанды. Алайгъа школчула устазлары бла бирге, район эм эл администрацияланы келечилери, ветеранла да келген эдиле. Жыйылгъанланы аллында сёлеше, район администрацияны башчысыны орунбасары Къазийланы Анатолий бу эсгериу ишни къурагъанлагъа, анга къатышханлагъа да ыспас этгенди. Ата журтдан узакъда бизни жерлешлерибиз аланы боюнларына салыннган аскер борчну бет жарыкълы толтургъандыла, аппаларыны, аталарыны жигитликлерине, берген антларына да кертичи болгъандыла, деп белгилегенди. Митингде ёсюп келген тёлюге кеслерини насийхат сёзлерин урушну бла урунууну ветеранларыны республикалы советини таматасы Мухамед Шихабахов, ДОСААФ-ны регион бёлюмюню председатели Мухажир Закураев, Афган урушну, башха аскер къаугъаланы ветеранларыны союзуну Черек районда бёлюмюню башчысы Арсен Тхагалегов, районда физкультура, спорт эм жамауат организацияла бла байламлыкъла жюрютюу жаны бла комитетни таматасы Аккыланы Хасан да сёлешгендиле. Иймам Аккыланы Даниял а Афганистанда, андан къайтхандан сора да урушда алгъан жараладан бла аурууладан ёлген жерлешлерибиз ючюн дууа тутдургъанды. Тюбешиуню ахырында митиннге къатышханла Черек райондан барып Афганистанда жоюлгъанланы эсгертмесине гюлле салгъандыла. Анда алты жашны аты жазылыпды: Бёзюланы А.Х, Бёзюланы Р.Б., Гадийланы Р.Р., Жазыколаны И.М,. Улбашланы А.Ш., Хасауланы М.М.
Поделиться: ЧИТАТЬ ТАКЖЕ:
|