Кёп къатлы юйлеге башчылыкъ этген компанияланы ишлери къаты къонтрольда турлукъду

КъМР-ни Парламентини президиумуну кезиулю жыйылыуунда «правительстволу сагъатны» чеклеринде къырал жашау журт надзорну тамамлауну соруулары сюзюлгендиле, кёп къатлы юйлеге башчылыкъ этген компаниялагъа лицензия бериуню низамына да къаралгъанды. Жыйылыуну спикер Татьяна Егорова бардыргъанды.

Энергетика, тарифле эм жашау журт надзор жаны бла министрни орунбасары КъМР-ни баш къырал жашау журт инспекторуну орунбасары Тахир Чимаевни билдиргенине кёре, республикада къырал жашау журт надзор тамамланнган юйлени кенглиги 16,8 миллион квадрат метрден асламды. Болсада баш магъана кёп къатлы юйледе жашагъанла бирге хайырланнган мюлкню болумуна бериледи.

Былтыр а министерствогъа инсанладан бла организацияладан 1167 тарыгъыу келгенди. Алагъа кёре пландан тышында 685 эмда белгиленнген 19 тинтиу бардырылгъанды. Аланы кезиуюнде жашау журт законлагъа 434 бузукълукъ этилгени ачыкъланнганды. Аны бла байламлы 739 акт, административ бузукълукъла этилгенлери бла байламлы 133 протокол бла закон бузулгъаныны юсюнден 97 эсгертиу жарашдырылгъандыла. Кёп къатлы юйледе тюрлю-тюрлю жумушла тамамлагъан организациялагъа, фатарланы иелерине этген бузукълукъла ючюн 547,3 минг сом тазир салыннганды.

Докладчы министерство жашау журт-коммунал жумушла ючюн тёлеуле къалай къуралгъанларына энчи эс бургъанын да чертгенди. Былтыр республиканы инсанларындан тарихле терс тохташдырылгъанларына 182 тарыгъыу келгенди. Тинтиуле бардырылып, тёлеуле жангыдан саналгъандыла (1187 минг сом багъасы). Асламында кемчиликле ток ючюн этилгендиле. Кёп къатлы юйлеге башчылыкъ этерге лицензия бериуню юсюнден айтханда, алгъын ала болжалсыз эдиле. Алай 2017 жылда кючюне кирген 485-ФЗ номерли законнга тийишлиликде ол беш жылгъа бериледи. Ол санда алгъадан ишлеген документле да законнга келишдирилирге керекдиле. Лицензияланы болжалларын созууну низамын РФ-ни Правительствосу тохташдырады.

Быйылны шартларына кёре уа, КъМР-ни лицензияларыны тизмесинде кёп къатлы юйлеге башчылыкъ этген 14 организацияны юсюнден шартла жокъдула. Аланы лицензияларыны кючлерин тохтатыуну юсюнден сюдге даула хазырланнганды.

Докладны сюзе, Татьяна Егорова кёп къатлы юйледе жашагъанла бирге къоратхан энергоресурсланы тохташдыргъанда чырмауланы юслеринде соргъанды. Тахир Чимаевни айтханына кёре, управляющий компанияла ахчаны толусунлай жыялмайдыла. Алай бла уа ала борчха тюшедиле.

Спикер право жаны бла жетишмеген затла бар эселе, Парламент министерствону предложенияларын сюзерге хазыр болгъанын чертгенди. Ол жыйылыуда къаралгъан сорууланы айырыучула приёмгъа келгенде дайым да кётюргенлерин да белгилегенди. Кёп къатлы юйледе газ атылгъан кезиулени юслеринден баргъанды сёз.

Ол бек уллу жарсыуладан бириди – аллай къыйынлыкълада адамларыбыз ёледиле. Биз бюгюн къабыл этерик эсгертиуледе уа министерствогъа мекямлада газ оборудованияны техника жаны бла тинтирге, ол жаны бла тийишли келишимле болгъанларын бла къалгъанларын сюзерге кереклиси белгиленипди. Бу иш къалай къуралыпды?»,-деп соргъанды спикер. Докладчыны айтханына кёре, ол излемлеге кёре тамамланады эм мындан ары да анга энчи эс бурулгъанлай турлукъду.

Парламентарийлени башха соруулары да болгъандыла. Жыйылыуда айтылгъан эсге алынып, жууаплы министерствогъа тийишли эсгертиуле къабыл кёрюлгендиле.

Парламентни президиумуну жыйылыуунда уа «Ветеринарияны юсюнден» законнга хазырланнган тюзетиулеге къаралгъанды. Аграр политика, экология, табийгъатны хайырланыу эм жер халла жаны бла комитетни башчысы Мокъаланы Кемал ангылатханыча, анда сёз ветеринарланы ишлерин къурауну юсюнден барады.

Депутатла федерал законланы проектлерин да сюзгендиле, башха регионладан коллегаларыны башламчылыкъларына да кеслерини эсгертиулерин хазырлагъандыла.

 

КъМР-ни Парламентини пресс-службасы.

Поделиться:

ЧИТАТЬ ТАКЖЕ:

29.03.2024 - 09:05

БАХЧАЛАНЫ БУЗДАН КЪОРУУЛАРГЪА – 40 МИЛЛИОН СОМ

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю.

29.03.2024 - 09:04

КАРТОФДАН БАЙ ТИРЛИК КЪУУАНДЫРАДЫ

Шимал-Кавказстатны управлениясындан  билдиргенлерича, былтыр Къабарты-Малкъарны  мюлклерини барысында да картофдан  154,6 минг тонна  жыйылгъанды.  Ол былтырдан 1,8 процентге кёпдю.

29.03.2024 - 09:04

ТАНГ КЕСЕК КОНСЕРВА ЧЫГЪАРЫЛАДЫ

Къабарты-Малкъар тахта кёгетледен консервала жарашдырыу бла эки жылны ичинде алчы жерни алады. Ол санда былтыр, 363,8 миллион банка чыгъарылгъанды.

28.03.2024 - 10:01

НИЕТ ХАЗНАБЫЗНЫ АЙНЫТХАНЛА

Халкъыбызны ниет жетишимин кёргюзтген Къулийланы Къайсын атлы Малкъар театрны къуралыуу озгъан ёмюрню 1930-чу жылларында башланнганды. 1935 жылда А.

28.03.2024 - 09:03

ГИТЧЕ ЭМДА ОРТА БИЗНЕСНИ МАГЪАНАСЫ УЛЛУДУ

Къайсы къыралда неда аны ичинде субъектде экономиканы айнытыугъа уллу къошумчулукъ этгенле гитче эмда орта бизнес бла кюрешгенледиле эмда энчи предпринимательледиле.