КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек Правительствэм и унафэщIхэмрэ муниципалитетхэм я Iэтащхьэхэмрэ кърихьэлIэу иригъэкIуэкIа зэIущIэр теухуауэ щытащ «ЦIыхухэмрэ абыхэм яIыгъ хьэлъэхэмрэ автомобиль транспортымкIэ, къалэхэм щызекIуэ электрическэ транспортымкIэ къыщешэкIыныр Урысей Федерацэм къыщызэгъэпэщыным, Урысей Федерацэм и закон акт щхьэхуэхэм зэхъуэкIыныгъэхэр хэлъхьэным я IуэхукIэ» Федеральнэ законым тету ди деж цIыхухэр пассажир транспортымкIэ къызэрыщрашэкIым хуэгъэза кIэлъыплъыныгъэр гъэткIииным.

Гулъытэ хэха хуащIащ мы IэнатIэм адэкIи зегъэужьыным, шынагъуэншагъэмкIэ хабзэхэр гъэзэщIэным, жылагъуэ транспортым и щытыкIэмрэ и теплъэмрэ къэгъэщIэрэщIэжыным, цIыхухэр къешэ­кIыныр къызэзыгъэпэщ организацэхэм Iэ зыщIадзауэ щыта контрактхэр зэрагъэзащIэр къэпщытэным.
КъБР-м Инфраструктурэмрэ бжыгъэ­хэр зи лъабжьэ зыужьыныгъэмкIэ и минис­терствэм къызэритымкIэ, псоми къагъэсэбэп транспортыр зытет маршрутхэм гъэ къэс цIыху мелуан 40 хуэдиз къыщрашэкI. Апхуэдэ къалэ муниципальнэ, муниципалитет зэхуаку, щIыналъэ зэхуаку маршрутхэр илъэсым и пэщIэдзэм 282-рэ хъууэ щытащ.
А махуэ дыдэм КIуэкIуэ К. В. иригъэкIуэкIащ республикэм и гъуэгухэм зегъэужьыным теухуа зэIущIэ. Абы къыщащта унафэм къыщыгъэлъэгъуащ 2019 гъэм къриубыдэу щIыналъэ, муниципальнэ мыхьэнэ зиIэ гъуэгуу километр 80-м щIигъу зэрагъэпэщыжыну е ирагъэфIэ­кIуэну зэрамурадыр.
Апхуэдэу «Автомобиль гъуэгу тэмэм­хэмрэ шынагъуэншагъэмрэ» лъэпкъ проектым ипкъ иткIэ Налшык къалэм и ­гъуэгухэр зэгъэпэщыжыным е егъэфIэ­кIуэным трагъэкIуэдэн папщIэ федеральнэ бюд­жетым къыхэкIыу дызэрыт илъэсым сом мелуан 432-рэ къыхуа­утIыпщынущ. 2019 гъэм ди щIыналъэм и гъуэгухэм щрагъэкIуэкIыну лэжьыгъэхэм республикэм и гъуэгу фондым къыхэкIыу сом меларди 2,8-м щIигъу, блэкIа илъэсым елъытауэ хуэдэ зырэ ныкъуэкIэ нэхъыбэ, трагъэкIуэдэнущ.