КъМР-ни Башчысыны къуллугъун толтургъан Казбек Коков Правительствону юйюнде «Жангы бийиклик» конкурсда хорлагъанла бла тюбешгенди. Жыйылыугъа законла чыгъарыучу эм аланы толтуруучу власть органланы, тюрлю-тюрлю ведомстволаны келечилери, предпринимательле да чакъырылгъандыла.
Жууукъ кезиуде ала кадр конкурсда айырмалыланы насийхатчылары болуп, аланы башчылыкъ этиуню, оноула чыгъарыуну жашырынлыкъларына юйретирикдиле. Тюбешиуге уа федерал инспектор Евгений Ткачёв, Къырал Думаны депутатлары Ирина Марьяш, Геккиланы Заур, Анатолий Бифов да къатышхандыла.
Казбек Коков жыйылыу бюгюннге дери конкурсну чеклеринде тамамланнган ишни эсеплерин чыгъарыр, мындан ары къайсы жол бла барыргъа, къаллай борчланы толтурургъа кереклисин белгилер мурат бла къуралгъанын чертгенди. ««Жангы бийиклик» республикада хунерли, фахмулу, Къабарты-Малкъарны алгъа барыуун жалчытыргъа сюйген жаш адамланы ачыкъларгъа онг бергенди»,-дегенди республиканы оноучусу.
Ызы бла сёз КъМР-ни Башчысыны Администрациясыны таматасы Мухамед Кодзоковха берилгенди. Ол бу кюнледе Къабарты-Малкъар къырал университетде конкурсда хорлагъанланы бла жууукъ кезиуде аланы насийхатчылары боллукъла бла тюбешгенлерин эсгертгенди. Анда жаш адамла проектлерин кёргюзтгендиле, билимлери, онглары бла шагъырей этгендиле.
- Насийхатчыла эм аланы сохталары келир ыйыкъда шарт тохташдырыллыкъдыла. Мындан ары уа битеу жумушла «Жангы бийиклик» клубну чеклеринде бардырыллыкъдыла. Анга конкурсда хорлагъанла барысы да киредиле,-дегенди эмда жаш адамланы толтуруучу власть органлада жамауат советлени ишлерине тири къатышыргъа чакъыргъанды.
Ызы бла уа конкурсда айырмалыла насийхатчылыкъ проект къалай бардырылыргъа кереклисини, ала къаллай сынаулагъа юйренирге сюйгенлерини, битеу бу жумушладан не зат сакълагъанларыны, республикагъа не бла болушаллыкъларыны юслеринден айтхандыла. Сёз ючюн, Алим Масировну оюмуна кёре, «Жангы бийиклик» клуб республиканы келир кюню, айныуу ючюн жарсыгъан хар инсанны да власть органлагъа предложенияла этерге онг берген жерге айланыргъа керекди.
Къалабекланы Алимни акъылына кёре уа, насийхатчылыкъ проектни чеклеринде таматала бла тюбеширге, ушакъла бардырыргъа тийишлиди. Ол а жаш адамлагъа кеслерини кемчиликлерин ачыкъларгъа, мындан ары айныуну жолларын сайларгъа болушурукъду.
Ксаналаны Марьяна уа «Россейли лидерлери» конкурсха къатышханланы Собянин, Лавров, Кириенко дегенча белгили политикле бла тюбешиуле, мастер-классла къуралгъанларына эс бургъанды. «Аллай атлары айтылгъан адамла бла ушакъла бардырыргъа онгубуз болса, ол бизни бек кёллендирлик эди»,- дегенди ол.
Дагъыда конкурсда айырмалыла республиканы инвестиция онгларын игилендириуню, туризмде сервисни тап халгъа келтириуню, къолайсызлыкъны кетериуню жолларыны, экономиканы айнытыр ючюн бийик технологиялы товарла чыгъарыргъа кереклисини эм кёп башха затланы юслеринден айтхандыла. Сёз предпринимательлени эркинликлерин сакълауну, бизнесге тыйгъычланы азайтыуну юслеринден да баргъанды. Республиканы табийгъат онглары уллу болгъанларын чертип, мында экология жаны бла таза тахта кёгетле ёсдюрюрге, адамланы саулукъларын багъыу амалланы кенгертирге предложенияла да этилгендиле.
Локияланы Алан а конкурс башланнганда кёпле ол тюзлюк бла бардырыллыгъына ийнанмагъанларын айтханды. Алай аны эсеплери белгили болгъанда, ала оюмларын тюрлендиргендиле. «Тыш къыраллада бизни жерлешлерибиз кёпдюле, ала жетишимлидиле, иш кёллюдюле. Конкурсда хорлагъанымы билгенден сора уа, аладан бирлери манга сёлешип, быллай тюрлениуле бар эселе, туугъан журтубузгъа болушургъа, кеслерини сынауларына юйретирге хазыр болгъанларын айтхандыла»,-дегенди ол. Бу конкурсдан къаллай болушлукъ сакълагъаныны юсюнден Зезаланы Рамазан да айтханды.
Жаш адамланы аллында Ирина Марьяш бла Евгений Ткачёв да сёлешгендиле. Ала да «Жангы бийиклик» алагъа кеслерини фахмуларын айнытыргъа, жангы сынаула жыйышдырыргъа онг бергенин чертгенди.
Ахырында Казбек Коков тюбешиуде этилген предложенияла эсге алынырыкъларын чертгенди. Ол залда жыйылгъанла, республиканы жамауаты да биригип, туугъан журтубузну мындан ары айнытыуда къолдан келгенни этериклерине ышаннганын айтханды. «Биз командабыз. Бирге болсакъ, къыралны башчысы салгъан борчланы, май указлада белгиленнген магъаналы жумушланы жетишимли тамамлаяллыкъбыз»,-дегенди ол.
Токъланы Фатима.
