КъБР-м и Iэтащхьэ КIуэкIуэ Казбек щыIащ Прохладнэ-Елъхъуэт гъуэгум щыщу километри 9,4-рэ щызэрагъэпэщыж щIыпIэм. Зи гугъу тщIы автомобиль зекIуапIэм зэпещIэ республикэм и Прохладнэ, Май щIыналъэхэр.
Фигу къэдгъэкIыжынщи, КIуэкIуэ Казбек, мы гъэм и мэкъуауэгъуэм а районитIым зэрыщыIам къыпэкIуэу, унафэ ищIат зи гугъу тщIы гъуэгум щыщу ди республикэм пхрыкI Iыхьэр зэгъэпэщыжын зэрыхуейм ехьэлIауэ. Федеральнэ проектхэм я Iэмалхэр къагъэсэбэпкIэрэ, а лэжьыгъэм текIуэдэну мылъкур шыщхьэуIум и кIэм ди республикэм къыIэрыхьащ.
КъБР-м и Iэтащхьэ КIуэкIуэ Казбек а щIыпIэм щригъэкIуэкIа зэIущIэм хэтащ республикэм транспортымрэ гъуэгу хозяйствэмкIэ и министр ДыщэкI Аслъэн, лэжьыгъэм егъэщIылIа IуэхущIапIэхэм я унафэщIхэр. Зэхыхьэм щытепсэлъыхьащ зэращIылIа зэгурыIуэныгъэм тету лэжьыгъэр щаухын хуей пIалъэмрэ иджырей технологиещIэу къагъэсэбэпхэм япкъ иткIэ гъуэгущIэм иIэн хуей теплъэр зыхуэдэмрэ.
Прохладэнэ-Елъхъуэт гъуэгур ящыщщ машинэхэр щыкуэдым. Зы жэщ-махуэм къриубыдэу абыкIэ щызокIуэ автомашинэу мин I4-м нэблагъэ. А гъуэгумкIэ щызэблокI Къэбэрдей-Балъкъэрым и мызакъуэу, Ставрополь крайм, Осетие Ищхъэрэ-Аланием, Ингушым къикIахэри, зэрыщыту къатщтэмэ, Кавказ Ишхъэрэр зыхуеину хьэпшыпхэмкIэ къызэзыгъэпэщ хьэлъэзешэ машинэхэри.
КъБР-м транспортымрэ гъуэгу хозяйствэмкIэ и министр ДыщэкI Аслъэн зэрыжиIащи, зэрагъэпэщыж гъуэгур хагъэхьащ Урысейм федеральнэ мыхьэнэ зиIэ и магистралхэм, абы къыхэкIыуи зэблэжыпIэ щхьэхуэу плIы иIэнущ, метр 20 и бгъуагъынущ.
Гъуэгум къаруушхуэ зэрырахьэлIэн хуейр гурыIуэгъуэт. Асфальтыжьыр тратхъунщIыкIыу, тракIутапхъэхэр тракIутэжу, асфальт-бетоныр и IувагъкIэ щыуэ зэтралъхьэжын хуейт. Апхуэдэуи, а лэжьыгъэм къыщагъэсэбэпынущ иджырей пщалъэм изагъэ абдж зыхэлъ полимер хъархэр, нэгъуэщIхэри. Лэжьыгъэхэр бжьыхьэми щIымахуэми ирагъэкIуэкIынущ, технологиещIэу къагъэсэбэпхэм гъэм и сыт хуэдэ зэманми уи Iуэхур къомыгъэувыIэну Iэмал къуатри.
IэщIагъэлIхэм зэрыжаIащи, Прохладнэ-Елъхъуэт гъуэгу зэпыщIапIэм щаухуэнущ лъэс лъагъуэхэр, щагъэувынущ автобус къэувыIэпIэхэр, апхуэдэуи, а щIыпIэм щызэрагъэпэщыжынущ лъэмыжитI. Шынагъуэншэу гъуэгур щытын папщIэ, зэпрыкIыпIэщIэхэр ящIынущ, гъуэгу дамыгъэхэр здэщытыпхъэхэм ягъэувынущ. Автомобиль зэжьэхэуэ къыщыхъункIэ хъуну хуагъэфащэ щIыпIэхэм гъущIым къыхэщIыкIа бжыхьхэр щагъэувынурэ, видео-камерэхэри трагъэувэжынущ.
Унафэ къащтащ онлайн Iэмалхэр къагъэсэбэпу, лэжьыгъэр зэрекIуэкIым кIэлъыплъыну, экспертхэми ирагъэлъэгъуну. ЗэIущIэм и кIэухым КIуэкIуэ Казбек жиIащ гъуэгухэр зыхуей хуагъазэмэ, ди щIыналъэм гъунэгъу республикэхэм транзит зэпыщIэныгъэу яхуиIэхэр нэхъыфIу зэрызэтраублэнури, гъуэгум и Iуфэхэм цIыхухэр нэхъ шынагъуэншэу зэрыщызекIуэнури.
Зэман гъунэгъум лэжьыгъэшхуэ къыфпэщылъщ. Федеральнэ лъэпкъ проектхэм я фIыгъэкIэ, 2024 гъэ пщIондэ фщIэни влэжьыни вгъуэтынущ. IэщIагъэлIхэм куэду къывэлъытащ автомобиль зекIуапIэхэр шынагъуэншэу зэрыщытынури. Мы лэжьыгъэр пылъхьэншэу къыдыщехъулIэмэ, дыгугъэ хъунущ нэгъуэщI гъуэгу зэхэкъутахэри зэдгъэпэщыжын папщIэ, дызэхуеину мылъку адэкIи къытхуаутIыпщыну», - жиIащ КIуэкIуэ Казбек, зэIущIэр щызэхуищIыжым.
НАФIЭДЗ Мухьэмэд.
