КъБР-м и Парламентым 2019 гъэм и гъатхэ лэжьэгъуэм и япэ зэIущIэр, зэрыхабзэу, къэрал, республикэ гимнхэмкIэ щIышылэм и 31-м къызэIуахащ.
Абы хэтащ УФ-м и Президентым КИФЩI-м и IуэхухэмкIэ и полномоченнэ лIыкIуэм Къэбэрдей-Балъкъэрым щиIэ и аппаратым и федеральнэ инспектор нэхъыщхьэ Ткачёв Евгений, УФ-м и Федеральнэ Зэхуэсым ФедерацэмкIэ и Советым КъБР-м и Парламентым къыбгъэдэкIыу хэт Ульбашев Мухьэрбий, УФ-м и Къэрал Думэм и депутат Геккиев Заур, нэгъуэщIхэри.
КъБР-м и Парламентым и УнафэщI Егоровэ Татьянэ зэIущIэр къыщызэIуихым жиIащ республикэм и хабзэгъэув IэнатIэм и етхуанэ хэхыгъуэм и лэжьыгъэр фокIадэм зэриухыр, абы къыхэкIыу зыхунэмысахэмрэ къалэн нэхъыщхьэ дыдэхэмрэ депутатхэм зэфIахыну къазэрыпэщылъыр.
- Гулъытэ хэха хуэтщIын хуейщ бюджетыр зэрагъэзащIэмрэ лъэпкъ проектхэм хухах ахъшэр къызэрагъэсэбэпымрэ. Республикэм и хабзэхэр убзыхуа зэрыхъуар я фIыщIэщ Парламентым и депутату щыта псоми, - жиIащ Егоровэ Татьянэ. - Зыщыдгъэгъупщэ хъунукъым къалэн нэхъыщхьэхэм зэращыщыр ди хэхакIуэхэм, район унафэщIхэм нэхъ жыджэру дадэлэжьэныр. КъБР-м и Парламентыр нэгъабэ илъэс 25-рэ зэрырикъуам и щIыхькIэ, абы епха гуфIэгъуэ зэхыхьэхэр накъыгъэм тедухуащи, сыхуейт а Iуэхури фокIадэм екIуэкIыну хэхыныгъэхэри жэуаплыныгъэ тхэлъу зэфIэдгъэкIыну.
ЗэIущIэм щыхахащ зэзыгъэкIуж хеящIэм и къулыкъур зыхуагъэфэща цIыху зыбжанэ. Апхуэдэу Бахъсэн районым и суд IуэхущIапIэ №3-м зэзыгъэкIуж хеящIэу ягъэуващ Уэлий Альберт, Май район суд IуэхущIапIэ №2-м - Догуэ Мурат, Шэджэм район суд IуэхущIапIэ №3-м - Шыд Амур, Аруан район суд IуэхущIапIэ №3-м - Хьэгъэс Верэ.
«Урысей зэкъуэт» фракцэм хэт, КъБР-м и Парламентым и депутат Шондыр Олег езым и лъэIукIэ и къалэнхэр щхьэщахащ.
Депутатхэм зэIущIэм къыщащтащ «Къэбэрдей-Балъкъэр Республикэм и хабзэ щхьэхуэхэм зэхъуэкIыныгъэхэр хэлъхьэным теухуауэ» КъБР-м и хабзэм и проектыр, «Къэбэрдей-Балъкъэрым и ЩIы кодексым зэхъуэкIыныгъэхэр хэлъхьэным и IуэхукIэ», «Къэбэрдей-Балъкъэр Республикэм зи адэ-анэ зыщхьэщымытыжхэмрэ сабий зеиншэхэмрэ дэIэпыкъуныгъэ щагъуэтыным теухуауэ», «Къэбэрдей-Балъкъэр Республикэм хьэ хьэулейхэр къыщыубыдыным-рэ якIэлъыплъынымрэ къызэгъэпэщынымкIэ къалэн пыухыкIахэр къалэ округхэмрэ муниципальнэ районхэм- рэ я щIыпIэ самоуправленэхэм я органхэм пщэрылъ ящыщIыным ехьэлIауэ» КъБР-м и хабзэхэм я проектхэр.
ЗэIущIэм къыщыпсэлъащ КъБР-м и Парламентым къыщымыгъэлъэгъуа политикэ партхэм я лIыкIуэхэр: «УФ-м и къэзакъ парт» политикэ партым и щIыналъэ къудамэм и унафэщI Усачёв Арсен, «Партия Роста» урысейпсо политикэ партым и Къэбэрдей-Балъкъэр щIыналъэ къудамэм и унафэщI Щоджэн Роберт, «Яблоко» политикэ партым и Къэбэрдей-Балъкъэр щIыналъэ къудамэм и унафэщI Кучмезов Хьэким, «Урысей социалист парт» политикэ партым и щIыналъэ къудамэм хэт Гуанэ Арсен, «Урысейм и ветеранхэм я партым» и щIыналъэ къудамэм и советым и унафэщI Бровченкэ Николай, «Власть народу цIыхубэ-хэкупсэ парт» политикэ партым и щIыналъэ къудамэм и унафэщI Хьэмыз Ахьмэд. Абыхэм я Iуэху еплъыкIэр къагъэлъэгъуащ республикэм узыншагъэр хъумэнымкIэ и IэнатIэм зэрызегъэужьыпхъэм теухуауэ.
Щоджэн Роберт къыщыпсалъэм жиIащ дохутырхэмрэ медицинэ IэщIагъэлIхэмрэ я Iэзагъэм хегъэгъэхъуэ-ныр Iуэхугъуэ нэхъыщхьэ дыдэхэм ящыщу къызэралъытэр. «Ди жагъуэ зэрыхъунщи, иужьрей илъэс зыбжанэм лышх узыфэр зэуалIэм я бжыгъэм хэхъуауэ къагъэлъагъуэ. Абы къыхэкIыу сэбэп хъуну дыщогугъ республикэм щаухуэ онкологие сымаджэщыр. ДызэреплъымкIэ, медицинэ IэнатIэхэм зэпымыууэ цIыхухэр хагъэгъуэзэн, къыхураджэн хуейщ апхуэдэ узыфэхэр зищIысымрэ абы пэIэщIэ зэрызыхуащIыну Iэмалхэмрэ. Дохутырхэм къагъэлъагъуэ а узыфэхэм нэхъ пасэу, хэмытIасэ щIыкIэ, еIэзэн щIадзэмэ, зэрахуэгъэхъужыфыр», - жиIащ Щоджэным.
Гуанэ Арсен къыхигъэщащ щIыналъэм и щIыпIэ нэхъ пхыдзахэм я фельдшер-акушер IуэхущIапIэхэм аптекэхэр къыщызэIухыныр, сабийхэм яхухэха сымаджэщхэр IэмэпсымэхэмкIэ къызэгъэпэщыныр, республикэм «Земский доктор» къэрал программэр щыгъэзэщIэныр ублэжыныр гулъытэ хэха зыхуэщIыпхъэхэм ящыщу къызэралъытэр.