КъМР-ни Правительствосуну Председатели Мусукланы Алийни башчылыгъы бла бу кюнледе «СКФО-ну ышаннгылы айнытыу эмда инвестициялы онглары» деген бизнес-сессия бардырылгъанды. Аны республиканы Правительствосуну болушлугъу бла «Шимал Кавказны курортлары» акционер общество къурагъанды. Жыйылыугъа федерал эмда регионланы толтуруучу власть органларыны, бизнес жамауатны, илму учрежденияланы, банк бёлюмню келечилери эм башхала къатышхандыла.
Бизнес-сессияны ишин башлай, Мусукаланы Алий: «РФ-ни Экономиканы айнытыу министерствосу бизни республикагъа билеклик этгенине бийик багъа беребиз, Шимал Кавказны экономикасын айнытыу жаны бла магъаналы жумушланы сюзерге деп бери келгенигиз ючюн да ыразыбыз», - дегенди.
Республиканы социал-экономика жаны бла онгларыны юсюнден хапарлагъанда, КъМР-ни экономиканы айнытыу министри Рахайланы Борис ишсизликни азайтыуну, айлыкъны кёбейтиуню, регионну бюджетине берилген дотацияланы мардасын къыралда орталыкъ кёрюмдюге жетдириуню эм башына салгъанды. «Бюгюнлюкде Къабарты-Малкъарда онсегиз минг гектардан артыкъ жерни алгъан терк айныгъан терек бахчала бардыла. Жыйылгъан жемишледен 225 минг тоннасын буздурмай сакъларгъа онг берген инфраструктура къуралгъанды.
Терек бахчачылыкъдан сора туризм бла къурулуш да иги айный барадыла. Биринчисинде эки жюзден артыкъ предприятие ишлейди, беш мингден аслам адам урунады. Бир кезиуге оналты минг адам солурча жерле бардыла», - дегенди министр.
Ол информациялы технологияланы айнытыугъа, энергетиканы андан ары кючлендириуге энчи магъана берилгенин да чертгенди. Технопаркланы, бийик технологиялы паркланы айнытыу программалагъа да къатышыргъа таукелбиз, дегенди.
Жыйылыуда республиканы орта кезиулю инвестициялы онгларын, эл мюлкде эмда туризмде бизнес-проектлерин да сюзгендиле. КъМР-ни Правительствосуну Председатели айтханыча, бизнес-сессияда этилген оноула СКФО-да экономиканы айнытыу къаллай боллугъун шарт кёрюрге амал бередиле.
Улбашланы Мурат хазырлагъанды.