КъМР-ни Башчысыны къуллугъун болжаллы халда толтургъан Казбек Коков Х.М.Бербеков атлы Къабарты-Малкъар къырал университетде болгъанды. Регионну оноучусуну вузну таматалары бла тюбешиуюню кезиуюнде профессионал билим бериуню игилендириуню, жаш специалистлеге бла бийик окъуу юйлени бошагъанлагъа болушлукъ этиуню, республиканы экономикасыны баш магъаналы бёлюмлерине уста кадрла хазырлауну амаллары сюзюлгендиле.
Казбек Коков КъМКъУ-да студентлени илму, социал эмда жамауат проектлеринден артыкъда магъаналыларын жашауда бардырыр муратда къуралгъан Жамауат башламчылыкъланы арасыны иши эмда окъуу юйню техника онглары бла шагъырейленнгенди. Ол кюн окъуна РФ-ни Президентинде Халкъ мюлкню бла къырал службаны академиясыны себеплиги бла университетде муниципал къуллукъчулагъа деп бардырылгъан билим бериу интенсивни (семинарны бир тюрлюсю) ишине къатышханды.  
Жыйылгъанланы алларында сёлеше, ол былай белгилегенди: «Сиз республиканы адамлары бла кюн сайын да тюбешесиз, ма сизни ишигизге кёре багъа бичеди жамауат властьха. Бюгюнлюкде дуния бек терк тюрленеди, аны себепли биз заман бла бирге атларгъа, бола тургъан ишлеге кёре жууапла табаргъа сюе эсек, усталыгъыбызны дайым кётюргенлей турургъа керекбиз».
Казбек Коков РФ-ни Президентинде Халкъ мюлкню бла къырал службаны академиясыны Шимал-Кавказ институтуну специалистлерине бу тюбешиуню къураргъа болушханлары ючюн жюрек ыразылыгъын билдиргенди, муниципал къуллукъчулагъа уа Къабарты-Малкъарны халкъына деп этген ишлери бютюн къыйматлы болурун тежегенди.
Муниципал къуллукъчулагъа деп къураллыкъ семинарланы бла тренинглени баш темалары быладыла: КъМР-ни социал сферасын бла экономикасын айнытыуну борчларын тамамлауда стратегия план салыу, проектлени толтуруу, алагъа башчылыкъ этиу эмда менеджмент.