Нальчикни полициячылары Искусстволаны Шимал-Кавказ къырал институтуну культура эм искусство колледжини студентлери бла тюбешгендиле. Анга Россейни МВД-сыны Нальчикде управлениясыны акъылбалыкъ болмагъанланы ишлери жаны бла инспекторлары, Экстремизмге къажау араны келечилери, Муслийманланы дин управлениясыны башчысыны болушлукъчусу Анджела Амшукова, Мария Магдалена атлы килисаны келечиси Константин Осипов да къатышхандыла. 
 Ушакъ терроризмни бла экстремизмни жайылыуларына къажау мадарланы юслеринден баргъанды. Къонакъла бу аманлыкъланы энчиликлерин ангылатхандыла, законлагъа бузукълукъла ючюн административ эм уголовный жууаплылыкъны  эсгертгендиле. 
 Дин къуллукъчула бир бирге тёзюмлю болургъа, динлени араларында келишмеулюклени болдурмазгъа чакъыргъандыла. Сёз тюрлю-тюрлю миллетлени араларында мамырлыкъны, социальный сетьледе сакълыкъны юслеринден да баргъанды. Анджела Амшукова террористле кеслери жанлыланы интернетде излегенлерин белгилеп, танымагъан адамла бла ушакъ бардыргъанда, аны унутмазгъа тилегенди. 
Жаш адамланы къонакълагъа соруула берирге эмда алагъа тынгылы жууапла алыргъа онглары да болгъанды.
Тикаланы Фатима хазырлагъанды.