Тюнене КъМР-ни Жарыкъландырыу, илму эмда жаш тёлюню ишлери жаны бла министерствосунда волонтёрла-доброволецле республиканы Башчысыны къуллугъун болжаллы халда толтургъан Казбек Коков, КъМР-де баш федерал инспектор Евгений Ткачев, башында айтылгъан ведомствону таматасы Ауес Кумыков, КъМР-ни культура министри Мухадин Кумахов бла тюбешгендиле.
Регионну оноучусу бек алгъа волонтёрла къурагъан кёрмюч бла шагъырейленнгенди, бу къымылдау къаллай ишле тамамлагъаныны юсюнден хапаргъа тынгылагъанды. Сёз ючюн, Хорламны волонтёрлары Уллу Ата журт урушну ветеранларын жокълайдыла, «Ёлюмсюз полкну» ишине тири къатышадыла. Жаланда былтыр жюз бла жарымдан артыкъ жумуш тамамлагъандыла. Быйыл а аллыбыздагъы уллу байрамны 75-жыллыгъы бла байламлы кёп тюрлю акцияла бардырыргъа белгилейдиле.
Медикле уа биринчи болушлукъну къалай берирге кереклисини юсюнден макетледе кёргюзтюп хапарлагъандыла. Экологла да кеслери жарашдыргъан проектни юсюнден айтхандыла. Былтыр а Шимал Кавказны кёп республикаларыны араларында биринчи жерге чыкъгъанларын, алагъа экология эмда табийгъатны къоруулау министри Шауаланы Илияс уллу себеплик этгенин да билдиргендиле. Социал жаны бла ишлегенлени, «Кюмюш» волонтёрланы да ёхтемленирча, махтанырча жетишимлери болгъандыла.
Ызы бла къонакъла волонтёрладан толу залгъа киргендиле. Алагъа жаш адамла толкъун къарсла бла тюбегендиле. Казбек Коков республиканы жаш тёлюсюню волонтёр къымылдаууну иши бла шагъырейленнгенин эмда ыразы болгъанын айырып айтханды. РФ-ни Президенти Владимир Путин бу къымылдаугъа уллу магъана бергенин да эсгертгенди.
-Жандауурлукъ, жюрек халаллыкъ, дагъыда адамда болургъа керекли битеу аллай огъурлу ышанла бюгюнлюкде жамауатыбызгъа ышаныулукъ бередиле. КъМР-де волонтёрлукъ ишни юсюнден мен эшите тургъанма, алай бюгюн сизни кесигизни кёрюп, тынгылап, сиз керти да бу жумушха жюрегигиз бла берилгенигизге тюшюннгенме.
Андан сора да, сиз къыралны магъаналы ишлерине да тири къатышханыгъызны билеме. Ол а Къабарты-Малкъарны жаш тёлюсю не жумушну да ышанырча болгъанына ийнандырады. Сиз бюгюнлюкде ветеранланы, инвалидлени да жюреклерин жылытасыз, экологияда магъаналы жумушланы тамамларгъа болушасыз, билим бериуню алгъа элтирге себеплик этесиз,сау болугъуз!-дегенди Казбек Валерьевич. Ол Волонтёрну жылы бошалгъанына да къарамай, бу къымылдау андан ары кюч ала барлыгъына, аны тизгинлерине бютюн кёп жаш адам къошуллугъуна да ийнаннганын билдиргенди.
Ызы бла Къабарты-Малкъарны оноучусу волонтёрлукъ ишге уллу къыйын салгъан Къазийланы Юсюпге, Надежда Кривчикге, Милана Тлиашиновагъа, Алим Тхамоковха бюсюреу къагъытла бергенди.
Ол кюн жаш адамла уа былтыр декабрьде Минги тауну тийресинде Россейни битеу волонтёр къымылдауларыны башчылары уллу форум бардыргъанларын эсге салгъандыла. Ол а регион къымылдау битеу Россейде да биринчи жерге чыкъгъанына шагъатлыкъ этгенин ёхтемлик бла айтхандыла. Ызы бла ала Казбек Коковха кеслерини оюмларын, муратларын, тилеклерин да билдиргендиле.
Сора волонтёрланы тизгинлерине къошулургъа ыразылыгъын соруп, анга удостоверенияны эмда энчи белгини бергендиле. Волонтёрланы «Ачыкъ къол» деген уллу белгисини юсюнде къол салырын да тилегендиле. Республиканы оноучусу былай жазгъанды: «Сау болугъуз! Тутхан ишигизде жетишимле тежейме. К.Коков».
Ахырында волонтёрла, къонакъла бла бирге суратха тюшгендиле.
