КъМР-ни Законла чыгъарыучу органында «Парламентаризмни школуну» кезиулю жыйылыуу болгъанды. Бу федерал проектни республикада «Единая Россияны жаш гвардиясы» жамауат организацияны регион бёлюмю эмда Жаш тёлю палата толтурадыла.
«Школну» окъуучуларына Парламентни спикерини орунбасарлары Михаил Афашагов эм Жанатайланы Салим, Социальный политика, урунуу эм саулукъ сакълау комитетни башчысы Хусейн Кажаров эмда Парламентни Аппаратыны право жаны бла управлениясыны башчысы Аслан Хамуков бла тюбешиу къуралгъанды. Биринчиден, жаш тёлюню башында сагъынылгъан эки къуллукъчу алгъышлагъандыла. Ызы бла уа махкемени таматасы Россейде жаш тёлю парламентаризмни болумуну эмда аны айнытыуну амалларыны юслеринден доклад этгенди. Бу теманы уа жаш адамла кеслери сайлагъанларын белгилерчады.
Докладчы, биринчиден, парламентаризмни энчиликлерин, къырал къурулушну амалларын, законла чыгъарыучу органны баш борчларын ангылатханды. Ёсюп келген жашланы, къызланы политикада магъанасыны юсюнден айта, ол Россей демократиялы, праволу эм социальный къырал болур ючюн ала аны жамауат-политика жашаууна тири къатышыргъа кереклисин энчи белгилегенди. Хар заманда да жангырыуну ал сатырында баргъанларын белгилеп, къыралда социальный тюрлениулени баш кючю болгъанларын айтханды.
Бюгюнлюкде уа законла чыгъарыучу (неда представительный) органларында жаш тёлю парламентле къураладыла. Бу институт власть къурамланы жаш адамланы араларында байламлыкъланы къураргъа болушханы бла бирге къыралда кадр резервни толтурууну баш амалыды.
Сёз тыш къыраллада бу иш къалай къуралгъаныны юсюнден да баргъанды. Докладчы жыйылгъанланы социология тинтиулени эсеплери бла да шагъырей этгенди. Анга тийишлиликде жамауатны 75 проценти тенгли бири жаш тёлюню юйретиуде совет къыралны  сынауун хайырланыргъа кереклиси жанлыды. Ол айтылгъан представительный органланы къурагъанда да хайырлы боллукъ эди.
Белгиленнген темагъа тийишлилени сейирлери уллу болгъаны кёрюнюп тура эди. Анга уа соруула кёплюгю да шагъатлыкъ этеди. Алагъа жууапла бере, Михаил Афашагов бла Жанатайланы Салим жаш тёлю структураланы жамауат даражаларын кётюрюрге кереклисин айтхандыла.
«Дерсни» кезиуюнде башхаладан тири болгъан, кёп соруула берген жашлагъа бла къызлагъа уа тюбешиуню къурагъанладан эсде къаллыкъ саугъала бергендиле. «Парламентаризмни школуну» чеклеринде уа барысындан да айырмалы, тири жаш адам КъМР-ни Парламентини депутатыны болушлукъчусуна алынырыкъды. Энтта ючеуленнге уа «Единая Россияны Жаш тёлю гвардиясыны» Москвада ара штабында стажировка ётерге онг берилликди.