Кёп болмай Элбрусда РФ-ни жарыкъландырыу министрини орунбасары, «Билим бериу» проектни администратору Татьяна Васильеваны башчылыгъы бла «Россей Федерацияны субъектинде «Билим бериу» миллет проект: бийик жетишимлеге жетиширча ресурсланы бирикдириу» деген ючюнчю битеуроссей кенгеш болгъанды. Анга къыралны 64 регионуну келечилери – профильли ведомстволаны, департаментлени, «Билим бериу» миллет проект бла байламлы информация-аналитика араны эм «Россейни жарыкъландырыу академиясыны» специалистлери эм башхала къатышхандыла. Ол санда КъМР-ни Правительствосуну Председателени орунбасары Марат Хубиев, жарыкъландырыу, илму эмда жаш тёлюню ишлери жаны бла министр Анзор Езаов да.
Форум эки кюнню баргъанды, анда асламысында быйыл «Билим бериу» миллет проектге кирген регион эм федерал программала къалай къуралгъанлары сюзюлгенди. Аны чеклеринде «Жангы школ», «Хар сабийни жетишими» эм «Цифралы билим бериу онгла» дегенча программалагъа да эс бурулгъанды. Келир заманда тамамланыргъа тийишли проектле эм борчла да белгиленнгендиле.
Татьяна Васильева, Анзор Езаов, Россейни жарыкъландырыу академиясыны таматасыны къуллугъун толтургъан Павел Кузьмин, Элбрус районну башчысыны къуллугъун толтургъан Сотталаны Къурман Огъары Бахсанда ишлене тургъан садикни къурулушу къалай баргъаны бла шагъырейленнгендиле. Учреждениягъа 42 сабий жюрюрюкдю, кеси да бюгюннгю излемлеге бла мардалагъа келиширикди. Ол «Тиширыулагъа урунургъа болушуу – юч жыллары толмагъан гитчелеге школгъа дери билим алырча онг тапдырыу» федерал эм «Демография» миллет проектлеге кёре бардырылады. Аны къурулушуна саулай 39,3 миллион сом къоратыллыкъды. Бюгюнлюкде мында сюртюу-бояу ишле тамамланадыла. Социал магъаналы объектни толусунлай быйылны ахырына жашаугъа кийирир муратлыдыла.
Ызы бла къонакъла Заюковода ата-анасыз эм къарар адамлары болмай къалгъан сабийле жашагъан 5-чи номерли интернат-школуну мурдорунда къуралгъан «Доброшколада» да болгъандыла. Ол «Жангы школ» федерал эм «Билим бериу» миллет проектлени чеклеринде саулукъларында бир тюрлю кемчиликлери болгъанлагъа тийишли онгла бла себеплик этер хыйсапдан ишленнгенди.
Мында жангы окъуу жыл, бирси мектепледеча, биринчи сентябрьде башланнганды эмда качестволу билим берирча мадар этилгенди. Дерследен сора да, аш этерге, тигерге, къурулуш, агъач усталыкълагъа да юйретген мастерскойла бардыла. Сабийле бла психолог, дефектолог, логопед эм башха специалистле да ишлейдиле.
Интернат-школну ремонтуна республика 2,5 миллион сом бергенди. Аны материал-техника мурдорун жангыртыргъа уа федерал бюджетден 7 миллион сомдан артыкъ бёлюннгенди.
Ахырында уа къонакъланы концерт программа бла къууандыргъандыла эм тамаша жерле бла шагъырейлендирирча экскурсия да къурагъандыла.
Магометланы
Сулейман.
