Къэбэрдей-Балъкъэр Республикэм гъуэгум шынагъуэншэу щызекIуэным хуэгъэпса, тхьэмахуэ зэхуакум къриубыдэу ирагъэкIуэкIыну Iуэхум щыщIи­дзащ. Ар къызэIуихащ Токио щекIуэкIа Олимп джэгухэм я чемпионкэ Ласицкене Марие. Лъагэу дэлъеинымкIэ дуней псом щыцIэрыIуэ, дызэрыгушхуэ спортсменкэм сабийхэм гъуэгум щахуэсакъыну, абы зэрыщызекIуапхъэ хабзэхэм цIыкIухэр хуагъэсэну балигъхэр къыхуриджащ. 

Спортсменкэ цIэрыIуэм Iуэхур диIыгъыу Къэрал автоинспекцэм и республикэ управленэм щIыгъуу «Гъуэ­гум шынагъуэншэу щызекIуэным теухуауэ Ласицкене Марие и чэнджэщхэр» листовкэхэр къыдигъэкIащ. 
«ЗэпрыкIыпIэ хэхамкIэ гъуэгур зэпыупщIын», «Автомашинэм шэнтжьейр къыщыгъэсэбэпын», «Уэ бгъэлъа­гъуэ щапхъэр нэхъыфIщ» къыхуеджэныгъэхэр, гъуэгу шынагъуэншагъэм и хабзэхэр къыбгурегъаIуэ, адэ-анэ­хэр сабийхэм гъуазэ зэрахуэхъур уигу къегъэкIыж. 
Ласицкене Марие сабийхэм ехъуэхъуащ я гъуэгур шынагъуэншэу щытыну, спортым хэтыну, гъащIэ узыншэ ирахьэкIыну къыхуриджащ. Адэ-анэхэм яжриIащ гъуэгум зэрыщызекIуэ хабзэхэм я бынхэр хуагъэсэну. 
Iуэхур диIыгъащ КъБР-м и Парламентым и унафэщIым и къуэдзэ, Олимп чемпион Къардэн Мурат. 
Автоинспекторхэм гъуэгу шынагъуэншагъэм укъыхуе­зыджэ тхылъымпIэ напэхэр нэхъыбэу къыдагъэкIыжащ икIи республикэм щыпсэухэми и хьэщIэхэми хуагуэшынущ. 
УАРДЭ Жантинэ.