Къэбэрдей-Балъкъэрым лэжьыгъэ IуэхукIэ махуитIкIэ щыIащ Урысейм и Жылагъуэ палатэм псэупIэ-коммунальнэ хозяйствэмкIэ, ухуэныгъэмкIэ, гъуэгухэмкIэ и комиссэм и тхьэмадэ Шпектор И. Л.
ХьэщIэр иригъэблэгъащ КъБР-м и Правительствэм и УнафэщI Мусуков А. ТI. ЗэIущIэм щытепсэлъыхьащ щIыналъэм псэупIэ-коммунальнэ хозяйствэмкIэ и IэнатIэм хиубыдэ IуэхущIапIэхэр къэгъэ-щIэрэщIэжыным, инвестицэхэр къызэщIэгъэуIуэнымкIэ Iэмал тэмэмхэр къыщызэгъэпэщыным, жылагъуэ кIэлъыплъыныгъэм и иджырей Iэмалхэр къэгъэсэбэпыным, апхуэдэу псэупIэ-коммунальнэ хозяйствэм и Iуэхутхьэбзэу цIыхухэм къагъэсэбэпхэр егъэфIэкIуэным, псэупIэ фондыр зэрызэрахьэ щIыкIэр гъэтэмэмыным.
А махуэ дыдэм хьэщIэри хэту ирагъэкIуэкIащ КъБР-м и Правительствэм и УнафэщIым и къуэдзэ - КъБР-м инфраструктурэмрэ бжыгъэхэр зи лъабжьэ зыужьыныгъэмкIэ и министр Бэлэтокъуэ В. Хь., КъБР-м и Жылагъуэ палатэм и тхьэмадэ Берд Хь. А., КъБР-м и Парламентым и депутатхэр, Iуэхум егъэщIылIа министерствэхэмрэ ведомствэхэмрэ я унафэщIхэр, муниципальнэ районхэм- рэ къалэ округхэмрэ я Iэтащхьэхэр, апхуэдэу республикэр энергиекIэ къызэзыгъэпэщ IуэхущIапIэхэм, фэтэр куэд хъу унэхэр зезыхьэ компаниехэм я лIыкIуэхэр къызрагъэблэгъа зэIущIэ. Абы щыхэплъащ унэхэр псыкIэ къызэзыгъэпэщ, псы фIейр зэрыщIаш системэхэр къэгъэщIэрэщIэжыным, фэтэр куэд хъу унэхэр капитальнэу зэгъэпэщыжыным, унэ кхъахэхэм щIэс унагъуэхэр гъэIэпхъуэным, жылагъуэхэм я санитар щытыкIэр егъэфIэкIуэным, кIэрыхубжьэрыхухэр зэрызэхуахьэсымрэ зэрыдашымрэ гъэтэмэмыным пыщIа Iуэхухэм.
Шпектор Игорь къыщыпсалъэм къыхигъэщащ жылагъуэхэр зэIузэпэщ щIынымрэ къалэхэм я щытыкIэр егъэфIэкIуэнымкIэ Къэбэрдей-Балъкъэрым зэфIэкI зэрыбгъэдэлъыр. «Къалэхэмрэ жылагъуэхэмрэ зэIузэпэщ щIыным фызэрегугъур икъукIэ гуапэщ. А мурадхэм тригъэкIуэдэн папщIэ республикэм къыIэрыхьа бюджет ахъшэр зэрызэригъэзахуэр къапщтэмэ, ар адрей щIыналъэхэм щапхъэ яхуэхъун хуейщ. Дауэ щымытми, зэрыщыту псэупIэ-коммунальнэ хозяйствэм и IэнатIэм зегъэужьыным хуэгъэзауэ япэ игъэщыпхъэ къалэнхэр щыIэщ. Мы IэнатIэм и инфраструктурэм, псы фIейхэр щагъэкъабзэ IуэхущIапIэхэм, апхуэдэу республикэм и район щхьэхуэхэм фэтэр куэд хъууэ щыIэ унэхэр зэрызэрагъэпэщыжам дыщеплъым къыхэдгъэща Iуэхухэмрэ абыхэм яхуэтщIа дагъуэ щхьэхуэхэмрэ Правительствэм къилъытэну дыщогугъ», - жиIащ хьэщIэм.
Республикэм и щIыналъэ щхьэхуэхэр къыщызэхакIухьым хьэщIэхэр зэплъа IуэхущIапIэхэм ящыщщ Бахъсэн къалэм псы фIейхэр щагъэкъабзэ и IэнатIэр. Шпектор Игорь щIыгъуу абы кIуащ УФ-м и Жылагъуэ палатэм хэт Пригородов Игорь, КъБР-м инфраструктурэмрэ бжыгъэхэр зи лъабжьэ зыужьыныгъэмкIэ и министрым и чэнджэщэгъу Бэлагъы Борис, министрым и къуэдзэ - псэупIэ-коммунальнэ хозяйствэмкIэ департаментым и унафэщI Гъэсашэ Жамболэт, Бахъсэн къалэ округым и щIыналъэ администрацэм и Iэтащхьэ Мамхэгъ Хьэчим сымэ.