КъМР-де МВД-ны дежурный бёлюмюню «къызыу ызны» телефонуна бахсанчы сёлешгенди. Ич ишле органланы пенсиячысы Мухамед Абуков Бахсан районну ОМВД-сында ГИБДД-сыны жол-патруль службасыны инспекторлары тамата лейтенант Заур Пшиготижевге бла лейтенант Мухамед Кармоковха ыразылыгъын билдиргенди.

Акъсакъалны айтханына кёре, ол Бахсанда Ленин атлы орамда «ВАЗ-2107» машинасында бара болгъандыла. Алайда сунмай тургъанлай капотну тюбюнден тютюн уруп, жанып башлагъанды. Насыпха ол кезиуде алайда инспекторла бара болгъанды. Полициячыла болумну терк сюзюп, от ёчюлтюучюлени чакъыргъандыла. Алай ала жетгинчи машина толусунлай кюерге боллугъун ангылай, ала аны кеслери ёчюлтюп башлагъандыла.

- Жашлагъа жигитликлери, къайгъырыулукълары ючюн жюрегимден ыспас этерге сюеме. Мындан ары да къуллукъларын бийик даражада бардырсынла, - дегенди Мухамед Абуков. 

Тикаланы Фатима хазырлагъанды.