РФ-ни Басмасыны кюнюне жоралап, РФ-ни Миллет гвардиясыны КъМР-де Управлениясыны келечилери республикалы газетлени бла информация агентствону корреспондентлерине къонакъгъа келгендиле.
Управленияны башчысы Сергей Васильевни атындан журналистлени профессионал байрамлары бла алгъышлай, ведомствону пресс-службасыны таматасы Ольга Исаева Росгвардия тамамлагъан ишни жамауатха белгили этиу, аны борчларын ангылатыу артыкъда магъаналы болгъанын чертгенди. «Республиканы басма органлары бла хайырлы байламлыкъла къуралгъандыла деп ёхтемленип айтыргъа сюеме. Мындан ары да бирге ишлеп, Росгвардияны борчларын халкъгъа тюзлюк бла белгили этербиз деп ийнанама»,-дегенди ол эмда Ыразылыкъ письмола бергенди.
Ол кюн саугъаланнганланы арасында «Къабарты-Малкъар» информация агентствону баш редактору Къонакъланы Хасан, аны корреспонденти Уянланы (Ксаналаны) Фатима, «Заман» газетни журналисти Тикаланы Фатима, «КъМР-Медиа» къырал казна учрежденияны келечиси Холаланы Тамерлан эм башхала да бар эдиле.
Росгвардиячыла бла бирге уа журналистлени Ведомстводан тышында охрананы Управлениясыны Нальчикде бёлюмюню келечилери да алгъышлагъандыла. «Сизге коллегала деп шарт айталлыкъма. Журналистле бизни бла бирге ал сатырдадыла»,-дегенди Управленияны башчысыны орунбасары полицияны полковниги Эндрейланы Марат эмда саулукъ, мамырлыкъ тежегенди.
