Шэшэн Республикэм и Грознэ къалэм фокIадэм и 11-19 махуэхэм щекIуэкIынущ Лъэпкъ театрхэм я «Федерация» III Урысей­псо фестивалыр. 

Зэхыхьэ иным и япэ зэIущIэр, а махуэ дыдэхэм ирихьэлIэу, 2019 гъэм зэхашат, Театрхэм я илъэсым къызэрагъэпэща Iуэху нэхъыфIхэм ящыщ зыуэ ар зэрыщытами пцIы хэлъкъым. Ар щекIуэкIам УФ-м и Театр лэжьакIуэхэм я зэгухьэныгъэм и тхьэмадэ Калягин Александррэ Шэ­шэн Республикэм и Iэтащхьэ Кадыров Рамзанрэ жаIат «Федерация»-р илъэс къэс зэхэшэн хуейуэ. Iуэхум игъуэта мыхьэнэр ягъэ­мэщIакъым 2020 гъэми. Пандемием цIыхухэр зригъэува щытыкIэ гугъум емылъытауэ, урысейпсо зэ­хьэзэхуэм и етIуанэ зэIущIэр дахэу, Iэтауэ ирагъэкIуэкIащ. 
Фестивалым щагъэлъэгъуа спектаклхэр зыр адрейм ехьэехуэу фIы защIэт, зэIущIэм и къызэгъэпэща­кIуэхэм ягъэува мардэхэм изагъэрт, мурадхэм хуэ­кIуэрт. Псалъэм и хьэтыркIэ, фестивалым и къалэнхэм ящыщщ Урысей Федерацэм и щIыналъэ псоми я зэхуэдэ щэнхабзэ утыку къы­зэгъэпэщыныр; теат­рым дихьэххэр я хэкур фIыуэ ялъагъуу, псэ къабзэрэ хьэлэрэ яIэу, эстетикэ гъэсэныгъэ етыныр; щэнхабзэ лъапIэныгъэхэр зыхегъэщIыкIыныр; лъэпкъхэм я зэхуаку зэгурыIуэрэ лъагъуныгъэрэ дэлъхьэныр; къэралым и лъэпкъ театрхэм я зэпыщIэныгъэр нэхъри гъэбыдэныр, я лэжьыгъэм хэлъ нэхъыфIхэмкIэ ахэр зэдэгуэшэныр, нэ­гъуэщIхэри. 
жылагъуэ-политикэ мы­хьэ­нэ, художественнэ лъагагъ ин зэ­риIэм къыхэкIыу Фестивалыр федераль­нэ Iуэху хъуащ, Урысейм и Президент Путин Владимир ар и нэIэм щIэтщ, илъэс ­                къэс егъэкIуэкIынри хабзэ ящIащ.
КъызэгъэпэщакIуэр УФ-м ЩэнхабзэмкIэ и министерствэмрэ Урысейм и Театр лэ­жьа­кIуэхэм я зэгу­хьэ­ны­гъэм­рэщ. Ар ирагъэкIуэкI «Культура» лъэпкъ проектым хыхьэу, Шэшэн Республикэм и Iэтащхьэр и щIэгъэ­къуэну. 
Фестивалым зыкъыщагъэлъэгъуэнущ Хакасием, Тэтэрстаным, Саха-Якутие, Къэрэшей-Шэрджэс, Къэ­бэрдей-Балъкъэр, Карелие, Дагъыстэн, Алтай, Коми, Марий-Эл, Шэшэн республикэхэм я театрхэм. Зэхыхьэшхуэм кърихьэлIахэм я пащхьэ кърахьэнущ дунейпсо, иджырей, лъэпкъ драматургиехэм щыщ лэ-жьы­гъэ гъэщIэгъуэнхэр. Ма­хуийм и кIуэцIкIэ спектакль 14 ягъэлъэгъуэнущ. 
Дэтхэнэ зы зэIущIэ инми хуэдэу, «Федерация» фес­тивалым хэтынущ щэнхабзэ программэ. Псоми тщIэ, щIэх-щIэхыурэ къагъэсэбэп мастер-классхэм, семинархэм, «стIол хъурейхэм», лабораторэхэм къадэкIуэу, фестивалым и къызэгъэпэщакIуэхэм абы хагъэхьащ нэгъуэщI щIэщы­гъуэ­хэри. Псалъэм папщIэ, federation-кейс, видео-салон, директор бранч, дискуссия-баттл, public talks зы­фIащахэр, творческэ зэIу­щIэхэр. 
Фестивалым и ещанэ зэхуэсым и къызэгъэпэща­кIуэхэм я фIэщ мэхъу абы хэтхэми кърихьэлIэхэми а махуэхэр гукъинэж зэращыхъунур. Урысейм и щIыналъэ 11-м ящыщу цIыху ­400-м щIигъу екIуэлIэнущ фес­тивалым. 

ИСТЭПАН Залинэ.