Автомобиль зекIуапIэхэмрэ туристхэр бгыхэм дэзыш кIапсэ гъуэгухэмрэ нэхъыбэ щIыным хущIэкъуным Къэбэрдей-Балъкъэрым зыгъэпсэхуакIуэу къакIуэхэм я бжыгъэм хигъэхъуэнущ. Ар щыжиIащ УФ-м Кавказ Ищхъэрэм и IуэхухэмкIэ и министр Чеботарёв Сергей, ди республикэм и къэрал властым и гъэзэщIакIуэ органхэр хэту ирагъэкIуэкIа зэIущIэм къыщыщыпсалъэм.
«Шэч хэлъкъым, щIыналъэм турист нэхъыбэ къешэлIа хъун папщIэ, псом япэрауэ, гъуэгухэмрэ инфраструктурэмрэ зэрызыщегъэужьыпхъэм. Гу лъумытэнкIэ Iэмал иIэкъым хьэщIэщ куэдым жьыфэ къазэрытеуами, абыхэм псыр, газыр, уэздыгъэр, къинэмыщIхэри езышалIэ инфраструктурэр зэрыщызэхъуэкIыпхъэми», - къыхигъэбелджылыкIащ Чеботарёв Сергей.
Фигу къэдгъэкIыжынщи, Чеботарёвыр зи пашэ министерствэм зэман зыбжанэ ипэкIэ щыжаIат 2024 гъэм ирихьэлIэу Кавказ Ищхъэрэм къакIуэ туристхэм я бжыгъэр, иджы зэрыщытым елъытауэ, щыкIэ нэхъыбэ хъун хуейуэ зэрыхуагъэфэщари.
Зи гугъу тщIы зэIущIэм министрым щыжиIащ, Iуащхьэмахуэ и джабэ нэкIухэм цIыхухэр дэзыш кIапсэ гъуэгухэм адэкIи къапыпщэ зэрыхъунур икIи, еплIанэ чэзур яухуэмэ, а Iуэхум ди щIыналъэм хьэщIэу къакIуэхэм я бжыгъэм хэпщIыкIыу зэрыхигъэхъуэнур. «Дуней псом щIыпIэ зыбжанэ къыщыбгъуэтыну аращ, мылылъэм лыжэкIэ къыщыбжыхь хъуну. Апхуэдэ «зэфIэкI» здэщыIэхэм Iуащхьэмахуэ лъапэ ящыщщи, абдежым а «Iуэхутхьэбзэри» къыщызэгъэпэщыпхъэщ», - къыпищащ и псалъэм министрым.
КъищынэмыщIауэ, Чеботарёв Сергей къыхигъэщащ, Кавказ Ищхъэрэм туризмэм зыщегъэужьыным хуэгъэзауэ ягъэхьэзыра Iуэху еплъыкIэм и проектыр УФ-м и Правительствэм зэрыIэрагъэхьар, ар мы гъэм къащтэну зэрыщыгугъыр, апхуэдэуи, Къэбэрдей-Балъкъэрым зыгъэпсэхупIэщIэхэр къыщагъэунэхун, щыIэхэр щегъэфIэкIуа хъун папщIэ, республикэм и къэрал, муниципальнэ властым пэрытхэм инвестицэщIэхэр ди щIыналъэм кърашэлIэн зэрыхуейр, нэгъуэщIхэри.