Тюнене Къабарты-Малкъаргъа Россей Федерацияны Шимал Кавказны ишлери жаны бла министри Сергей Чеботарев иш бла келгенди. Аны КъМР-ни Башчысыны къуллугъун болжаллы халда толтургъан Казбек Коков бла эки жанлы тюбешиуюнде республиканы жууукъ жыллада социал-экономика айныууну баш жоллары сюзюлгендиле, инвестиция проектле къалай толтурулгъанларына къаралгъанды, быйылгъа планла белгиленнгендиле. Ушакъны кезиуюнде регионда туризм бла байламлы объектлени тапландырыргъа кереклисини юсюнден да сёз баргъанды.
Бюгюнлюкде инвестиция программаны чеклеринде Чегем, Урван, Бахсан районлада талай предприятияны къурулушлары бошала турадыла, урлукъла чыгъарыу жаны бла араны къурауну проекти да толтурулады. Быйыл февральда Шимал Кавказны ишлери жаны бла министерствосунда 2019 жылда  къол салынырыкъ, ол санда СКФО-ну къырал программасыны Къабарты-Малкъар Республикада подпрограммасына кёре тамамланыллыкъ, инвестиция проектлени сайлау жаны бла ведомствола аралы ишчи къауумну жыйылыуун бардырыргъа белгиленнгенини юсюнден да билдирилгенди.
Андан сора КъМР-ни толтуруучу власть органларыны башчылары бла уллу кенгеш болгъанды. Анда республиканы производство эмда инвестиция онгларын не къадар толу хайырлана барыуну амалларына къаралгъанды.