Тюнене Правительствону юйюнде КъМР-ни Башчысыны къуллугъун болжаллы халда толтургъан Казбек Коков Битеуроссей халкъ фронтну (ОНФ-ни) регион исполкомуну таматасы Евгений Бакаев бла тюбешгенди. Ушакъны кезиуюнде жамауатны алгъын Къабарты-Малкъарны толтуруучу власть органларына билдирилген башламчылыкълары 2018 жылда къалай толтурулгъанларына къаралгъанды.
Алада сёз табийгъатны хайырланыуну бла къудуретни сакълауну, ол санда уучу мюлклени санын тап халгъа келтириуню, Жылы сууну тийресинде санитар болумну эмда аны тапландырыуну, андан сора да, республиканы районларында билим бериу, медицина, спорт, маданият объектлени къурулушларын эмда ремонтларын, ол санда Нарткъалада, Зольскоеде бла Прималкинскоеде физкультура-саулукъну кючлендириу комплекслени ишлеп бошауну, юсюнден баргъанды. Власть органланы бла жамауатны келечилерини бирге ишлеулерини хайырындан ол жумушла тамамлана келедиле.
Евгений Бакаев Казбек Коковха  келир заманлада жамауат башламчылыкъладан къайсылары толтуруллукъларын билдиргенди. Ол санда ОНФ-ни исполкомуну  Къабарты-Малкъар къатышырыкъ онеки миллет проект бла байламлы тематика майданлары къураллыкъларын, халкъ усталагъа себепликге къошакъ ишчи жерле ачыллыкъларын да айтханды.
Казбек Коков Битеуроссей халкъ фронтну, халкъны къайгъы этдирген бек керекли жумушланы тамамларгъа себеплик этген къыйматлы институтуча, магъанасы айтып айтмазча уллу болгъанын белгилегенди, мындан ары да аны бла бирге ишлеу Къабарты-Малкъарны жамауатына хайырлы боллугъуна ышаннганын билдиргенди.