КъБР-м и Iэтащхьэм и къалэнхэр пIалъэкIэ зыгъэзащIэ КIуэкIуэ Казбек ­Правительствэм и Унэм дыгъуасэ щыхуэзащ Урысейпсо цIыхубэ фронтым и щIыналъэ исполкомым и унафэщI Бакаев ­Евгений.

Псалъэмакъыр траухуащ Къэбэрдей-Балъкъэрым и гъэзэщIакIуэ властым и органхэм нэхъ япэкIэ къыхалъхьауэ щыта жэрдэмхэр 2018 гъэм зэрагъэзэщIам. ­Абыхэм хеубыдэ щIыуэпсыр къэгъэсэ­бэпыныр, дыкъэзыухъуреихь дунейр хъу­мэныр, зэщакIуэ псэущхьэхэм я бжыгъэр гъэтэмэмыныр, «Джылы-Су» псыхущхъуэ­хэм я къыщIэжыпIэм хиубыдэ щIыналъэхэр гъэкъэбзэнымрэ а щIыпIэр тэмэму къэгъэсэбэпынымрэ, республикэм и районхэм щыIэ еджапIэхэр, медицинэ, спорт, щэн­хабзэ IуэхущIапIэхэр зэгъэпэщыжыныр. ­Гулъытэ хэха хуащIащ Нарткъалэ, Зольскэ, Прималкэ къуажэхэм я физкультурэ комп­лексхэм щрагъэкIуэкIа лэжьыгъэм. Властым и органхэмрэ жылагъуэ лIы­кIуэхэмрэ зэгурыIуэу зэрыбгъэдыхьам къыхэкIыу, а IуэхущIапIэхэр и зэманым икIи тэмэму зэрагъэпэщыжащ.
Бакаев Евгений республикэм и уна­фэщIым хуиIуэтащ дызыхуэкIуэ зэман ­гъу­нэгъум къриубыдэу япэ ирагъэщыну жы­лагъуэ жэрдэмхэр зыхуэдэр, Къэбэрдей-Балъкъэрыр зыхэтыну лъэпкъ проект 12-м ятеухуауэ Урысейпсо цIыхубэ фронтым и щIыналъэ исполкомым илэжьынухэр.
КIуэкIуэ Казбек къыхигъэщхьэхукIащ цIыхухэр зыгъэпIейтей зи ­чэзу Iуэхугъуэхэр дэгъэкIынымкIэ Урысейпсо цIыхубэ фрон-тым икъукIэ лэжьыгъэшхуэ зэрыригъэ­кIуэкIыр икIи къыхигъэщхьэхукIащ влас­тым и IэнатIэхэмрэ а цIыхубэ зэгухьэ­ныгъэмрэ я къару зэхэлъкIэ IуэхуфI куэд адэкIи дагъэкIыну зэрыщыгугъыр.