Каменномостскоеде  кёпден бери тынгылы ремонт этилмеген Маданият юй  толусунлай жангыртылгъанды. Аны къууанчлы ачылыууна КъМР-ни Правительствосуну Председатели Мусукланы А.Т., РФ-ни Къырал Думасыны депутаты Геккиланы З.Д., КъМР-ни культура министри М.Л.Кумахов, Зольк районну жер-жерли администрациясыны башчысы Р.Х.Гятов, жамауат биригиулени келечилери, къурулушчула, школчула, бу эмда тёгерекдеги элледе жашагъанла да къатышхандыла.
Бу Маданият юйге 1966 жылдан бери тынгылы ремонт этилмегенди. Энди аны тыш  къабыргъалары, башы да толусунлай жангыртылгъандыла, инженер коммуникацияла, жылытыучу системасы да алышындырылгъандыла, къууанчла бардырылыучу залгъа, шахмат секциягъа, библиотекагъа тийишли оборудование салыннганды.
Жыйылгъанланы аллында сёлеше, КъМР-ни премьер-министри республиканы муниципал къуралыуларында маданият-адамланы бош заманларын къурау араланы айнытыуну программасына кёре былтыр 11 жангы Культура юй ишленнгенин, аладан экиси Зольск районда болгъанларын билдиргенди. Ол иш мындан ары да бардырыллыгъын чертип айтханды.
Алгъышлаула бошалгъандан сора уллу байрам концерт башланнганды. Анга уа республиканы  белгили жырчылары бла тепсеу ансамбльлери къатышхандыла. Зольск районну кесини артистлери да юлюшлерин къошхандыла.