Кёп болмай КъМР-ни экономиканы айнытыу министри Рахайланы Борис Россейни ётмек бишириучюлерини союзуну президенти Алексей Лялин бла тюбешгенди. Аны чеклеринде бёлюмню айнытыуну онглары сюзюлгендиле, ол санда къыралны жанындан предпринимательлеге тутхучлукъ этиуню юсюнден да сёлешиннгенди. Бу жаны бла регионлада болгъан ахшы амалла эсге алыныргъа керекдиле, деп да айтылгъанды.
КъМР-ни Правительствосу бла Россейни Ётмек бишириучюлерини союзу предпринимательлеге тутхучлукъ этиуню эм жамауатны качестволу продукция бла жалчытыуну юсюнден келишим этгендиле. Андан сора да, Алексей Лялин, ишлери бла шагъырейленир хыйсапда, Прохладна шахарда ётмек биширген предприятияланы жокълагъанды.
Эсге сала айтсакъ, РФ-ни Ётмек бишириучюлерини союзу 1993 жылда къуралгъанды. Анга предприятияланы, биригиулени таматалары, алимле, специалистле, жамауат организацияла эм башхала киредиле. Бюгюнлюкде аны регионлада эллиге жууукъ бёлюмю ишлейди. Союз къырал органланы, законадательствону, Совет Федерацияны, Къырал Думаны эм жер-жерли самоуправленияла бла да тири байламлыкъ жюрютеди.
