Сабийлени эркинликлери жаны бла омбудсмен Нальчикни полициячылары бла бирге «Радуга» реабилитация арада солугъан жашчыкъла эм къызчыкъла бла тюбешгендиле. Анда сёз акъылбалыкъ болмагъанланы эркинликлерини бла праволарыны юслеринден баргъанды.
Жыйылыугъа КъМР-де сабийлени эркинликлери жаны бла уполномоченный Светлана Тлинова, урунуу эм социал айнытыу министрни орунбасары Елена Романова, акъылбалыкъ болмагъанланы ишлери жаны бла инспектор Алчагъырланы Инга къатышхандыла. Ала инсанны праволарыны юслеринден айтхандыла, Адамны эркинликлерини эмда Сабийни эркинликлерини халкъла аралы конвенциялары бла шагъырей этгендиле. Ол кюн алгъан билимлери сабийлени эслеринде къалыр ючюн а оюнла   къуралгъандыла. Анга къатышханла тюрлю-тюрлю жашау болумланы кёргюзтгендиле. Жашла бла къызла уа  аны кезиуюнде кимни эркинликлери бузулгъанын айтыргъа керек эдиле. Окъуучула тири болуп, къонакълагъа соруула бергендиле, кеслерини оюмларын айтхандыла.
Алчагъырланы Инга юйюрде атаны, ананы бла сабийлени араларында сюймекликни, ышаныулукъну, бир бирге хурмет этиуню  магъанасыны юсюнден айтханды. «Алай акъылбалыкъ болмагъанны эркинликлери бузула эселе,  шартланы право низамны сакълаучулагъа белгили этерге керекди. Бизни телефон номерибиз къысхады – 02»,-дегенди ол.
Сабийлени эркинликлери жаны бла омбудсмен да болушлукъ излегенлеге не заманда да ачыкъ болгъанын айтханды.