Бэрбэч ХьэтIутIэ и цIэр зезыхьэ Къэ­бэрдей-Балъкъэр къэрал университетым тхьэмахуэ зэхуаку блэкIам къриу­быдэу щызэфIэкIащ бакалаврхэмрэ магистрхэмрэ я къызэрыщIагъэкI щIэ­ныгъэ квалификацэ лэжьыгъэхэр пхыгъэкIыныр, къэрал экзаменхэр тыжы­ныр. Ди гуапэ зэрыхъущи, мы гъэм ­университетым къыщIигъэкIа ныбжьы­щIэ­хэм яхэтщ журналист IэщIагъэм хуе­­джахэри.
Псори зэхэту къапщтэмэ, журналист IэщIагъэр зрагъэгъуэтащ ныбжьыщIэ ­19-м, абыхэм ящыщу 8-м магистратурэри къаухащ а унэтIыныгъэмкIэ. Къэпщытэныгъэхэр егъэкIуэкIынымрэ диплом лэжьыгъэхэр пхыгъэкIынымрэ зи пщэрылъ Къэрал экзамен комиссэ (ГЭК) къыхузэрагъэпэщат Iуэхум. Абы хагъэхьащ КъБКъУ-м и IэщIагъэлIхэр, республикэм и хъыбарегъащIэ IэнатIэхэм я лIыкIуэхэр. Ап­хуэ­дэхэт, къапщтэмэ, тхыдэ щIэныгъэхэм я доктор, КъБКъУ-м и Социально-гуманитар институтым КъБР-м щыпсэу лъэпкъ­хэм я этнологиемрэ тхыдэмкIэ, журналистикэмкIэ и кафедрэм и унафэщI ТекIуий Мадинэ, КъБР-м щIыхь зиIэ и журналистхэу «Адыгэ псалъэ» газетым и редактор нэхъыщхьэ Жыласэ Заурбэчрэ «Налшык» ОРТК-м и редактор-режиссёр Мысостышхуэ Маринэрэ, нэгъуэщIхэри.
Университетым КъБР-м щыпсэу лъэпкъ­хэм я этнологиемрэ тхыдэмкIэ, журналистикэмкIэ и кафедрэм и профессор, филологие щIэныгъэхэм я доктор Къамбэчо­къуэ Iэдэм, а кафедрэм и доцентхэу филологие щIэныгъэхэм я кандидатхэу Хъуэ­кIуэн Мурат, Лисеев Роман, тхыдэ щIэныгъэхэм я кандидат Журт Анжелэ сымэ я щIэныгъэ унафэщIу студентхэм ягъэзэщIа квалификацэ лэжьыгъэхэр, проектхэр ятещIыхьат хъыбарегъащIэ IэнатIэм узыщрихьэлIэ Iуэхугъуэ хьэлэмэт куэдым. Апхуэдэхэт КъБР-м и телеканалхэм къат хъыбарыщIэхэр зытегъэпсыхьахэр къыщызэпкъраххэр, «Орёл и решка» нэтыныр «Пятница» телеканалым, «Первый канал»-м хъыбарыщIэхэр щезыгъэкIуэкIхэм яIурылъ бзэмрэ я теплъэмрэ ехьэлIахэр, зэхъуэкIыныгъэм и лъэхъэнэм щыIа журналистикэм икIи социальнэ теп­лъэр къызыхэщыр, динымрэ гъащIэмрэ, спортымрэ ерыскъыпхъэхэмрэ ятеухуа нэтынхэр къызэрызэгъэпэща щIыкIэхэм ятеухуа лэжьыгъэхэр, нэгъуэщIхэри. А дип­лом лэжьыгъэхэм рецензэ хуатхат уни­верситетым и щIэныгъэлIхэм, респуб­ликэм и лъэпкъ журналистикэм и лэжьа­кIуэ пашэхэм. Абыхэм яхэтащ КъБКъУ-м и щIэныгъэ лэжьакIуэхэу, егъэджакIуэхэу Хъанэ Маринэ, Дэхъу Залинэ, Зэхъуэхъу Мадинэ сымэ, «Адыгэ псалъэ» газетым и къудамэм и редактор НэщIэпыджэ Замирэ, «Налшык» газетым и редактор нэхъыщхьэ Болэт Арсен, а редакцэм и лэжьакIуэ Гъуо Марианнэ, Мысостышхуэ Маринэ, «1КъБР» телеканалым и редактор, гъуазджэ щIэныгъэхэм я кандидат Сэралъп Самарэ, кинорежиссёр Хьэмыкъуэ Олег сымэ.
ГЭК-м хэтхэм ягу ирихьащ диплом лэ­жьыгъэхэр студентхэм зэрагъэзэщIа щIы­кIэмрэ ахэр зэрыпхагъэкIахэмрэ. ФIым я фIыжу къалъытащ Гугъуэтыж Дианэ, Къуэ­дзокъуэ Лаурэ, Корунец Каринэ, ­Алътуд Данэ, Сэбаншы Данэ, Тилов Уэс­мэн, нэгъуэщI студентхэми я квалификацэ лэжьыгъэмрэ проектхэмрэ.
ЩIэныгъэ куу КъБКъУ-м щызэзыгъэ­гъуэ­та, абы щыхьэт техъуэ тхылъхэр зи Iэрылъхьэ щIалэгъуалэм дохъуэхъу зы­Iэрагъэхьа ехъулIэныгъэхэмкIэ. Абыхэм я цIэфIыр, ябгъэдэлъ зэфIэкI лъагэхэм ятеу­хуа хъыбархэр зэман кIэщIым къриу­быдэу лъэпкъ журналистикэм зэры­щы­зэхэтхынури ди фIэщ мэхъу.