Къабарты-Малкъарны Башчысы Казбек Коков къурулуш эм инфраструктура проектле жаны бла штабны ишчи кенгешин бардыргъанды. Анга КъМР-ни Правительствосуну Председатели Мусукланы Алий, КъМР-ни къурулуш эм ЖКХ министри Алим Бербеков, КъМР-ни транспорт эм жол мюлк министри Аслан Дышеков, Нальчик шахар округну жер-жерли администрациясыны таматасы Таймураз Ахохов къатышхандыла. Кенгешде миллет проектлени, федерал эм регион программаланы ызларында бардырылгъан уллу объектлени къурулушлары сюзюлгендиле, къурулушда инвестиция кезиуню къысхартылыныууна да къаралгъанды.
Мусукланы Алий быйыл эки школну къурулушу башланырыкъларын билдиргенди: Прохладна шахар округда бла Куба элде – битеу тийишли жумушланы бардыргъандан сора къырал контрактлагъа къол салыу айны ахырына белгиленнгенди. Билим бериу махкемелени мекямларын сюеу келлик эки жылда тамамланырыкъды. Спорт пятиборье бла кюреширча спорт комплексни къурулушун бардырыргъа контрактха къол салыннганды. Ишле жууукъ заманда башланырыкъдыла.
КъМР-ни Башчысыны алгъын берген буйрукъларына тийишлиликде Прохладный шахар округну эм Прохладна районну ара больницаларына къошакъ халда медицина оборудование эм бюгюнлюкде жерине тохташдырылып жарашдырылыу ишлери тамамлана тургъан модуль котельня алыннгандыла. Солдатская станицада, Батех эм Огъары Бахсанда сабий садла ишленедиле. Аушигерде амбулаторияны къурулушу тындырылады. Солдатская бла Пролетарское станицалада суу жыйылгъан скважинала ишленедиле. Бахсан жыйымдыкъ быргъы ызны проектированиясы эм Элбрус районда тазалау сооруженияланы жангыртыу бардырылады.
Жол къурулушну юсюнден айта, Мусукланы Алий битеу жол карталагъа къол салыннганын, объектледе жол ишле къыстау болгъанларын билдиргенди. Быйыл Нальчикде ремонт этерге белгиленнген орамлада жер тюбюнде тартылгъан коммуникация ызланы жарашдырыргъа къошакъ халда эки жюз миллион сом чакълы бир бёлюннгенди. Казбек Коков орамланы игилендириуге жарыкълыкъ бла жалчытыу эм тротуарланы тапландырыу да къошулгъанын эсгертгенди.
Кенгешде дагъыда цифровизациягъа кёчюу, социал бёлюмде шёндюгюлю программа кереклени сингдириу соруула да сюзюлгендиле. Къурулушну бардырырча эркинлик алыуну заман болжалын эм ол жаны бла изленнген жумушланы санын къысхартыу соруулагъа да энчи къаралагъанды. КъМР-ни Къурулуш министерствосу муниципал къуралыула бла бирге инвестиция проектни хазырлауну документле кезиуюн къысхартырча онглагъа къарарыкъды.
