Кавказ Ищхъэрэм бгы лыжэкIэ къыщажыхь и курортхэм а спорт лIэужьыгъуэр фIыуэ зылъагъу псори кърагъэблагъэ 2019 гъэм къуршхэм щыIущIэну. Курорт псоми къызэрагъэпэщынущ цIыкIухэри балигъхэри дэзыхьэхыну нэгузыужь Iуэху зэмылIэужьыгъуэхэр.
Къапщтэмэ, Къэрэшей-Шэрджэсым и «Архъыз» курортым зыгъэпсэхуакIуэхэр щрагъэблэгъэнущ удз зэмылIэужьыгъуэхэм къыхащIыкIа шейхэмкIэ, IэфIыкIэхэмкIэ.
Шэшэным и «Ведучи» курортым сабийхэм папщIэ ИлъэсыщIэ псей щагъэувынущ икIи абы иращIэкIыну гуфIэгъуэхэр дыгъэгъазэм и 31-м шэджагъуэм ирихьэлIэу щIадзэнущ. Сабий псоми IэфIыкIэхэр, нэгъуэщI тыгъэхэр хуагуэшынущ.
Ингушым и «Архми» курортым я зэфIэкIыр щагъэлъэгъуэнущ республикэм и артистхэм.
Iуащхьэмахуэ щыIэ курортым и кIапсэ гъуэгухэр дыгъэгъазэм и 31-м сыхьэт 17-м нэсыху лэжьэнущ. ИлъэсыщIэм и япэ махуэм туристхэр метр 3847-рэ зи лъагагъ щIыпIэм щыIэ «Гара-Баши» станцым нэс дэкIыфынущ.
Нэгузыужь программэхэр хьэщIэхэм папщIэ ягъэхьэзырынущ хьэщIэщхэр, ресторанхэр, туристхэм я нэгу зыщрагъэужь комплексхэм.
Кавказ Ищхъэрэм и курортхэм фрагъэблагъэ!