КъМР-ни Башчысы Казбек Коков Элбрусну тау-магъадан комбинатыны генеральный директору Игорь Ушаков бла ишчи тюбешиу бардыргъанды. Ушакъны кезиуюнде Тырныауузда вольфрамны бла молибденни къазып эмда жарашдырып башлау бла байламлы инвестиция проектни толтурууну онглары сюзюлгендиле.
Игорь Ушаков билдиргеннге кёре, бюгюнлюкде геомеханика эмда гидрогеология тинтиулени бир кесеги бошалгъанды. Аланы эсеплери сюзюле турадыла. Проект документация жарашдырылгъанды, табийгъатха жетерге боллукъ хатаны ёлчемлери тергелгендиле эмда тау-байыкъландырыучу комбинатны къурулушуну амаллары тохташдырылгъандыла.
Андан сора да, комбинатны энергоресурсла эмда жол инфраструктура бла жалчытыугъа инвестицияладан къошумчулукъ этиу жаны бла мадарла да этиледиле. «Россети Северный Кавказ» эмда «Газпром газораспределение Нальчик» компанияла керекли объектлеге токну бла газны кеси ырысхыларына къошаргъа айтадыла. Быйыл август-сентябрь айлада комбинатны къурулушуна, жангы автомобиль жолгъа да майданла хазырлау жаны бла ишле башланырыкъдыла.
Магъадандан бир жылгъа 1,5 миллион тонна чакълы бирни къазып чыгъарыргъа эмда жарашдырыргъа белгиленеди. Ол а Россейде аллай продукцияны импортун толусунлай алышындырыргъа онг берликди. Проект толтурулса, 800 чакълы ишчи жер къуралыргъа боллукъду.
