КъБР-м и Iэтащхьэ КIуэкIуэ Казбек бадзэуэгъуэм и 1-м хэтащ Урысей Федерацэм и Правительствэм щIыналъэ зыужьыныгъэмкIэ и комиссэм и президиумым и зэIущIэу Урысейм и вице-пре­мьер Хуснуллин Марат иригъэ­кIуэкIам.

ЗэIущIэм щытепсэлъыхьащ «Къалэр ущыпсэуну тынш щIыныр» къэрал проектыр 2021 гъэм гъэзэщIа зэрыхъум, Урысей Федерацэм хыхьэ щIыналъэхэм я псэу­пIэ-коммунальнэ хозяйствэхэм щрагъэкIуэкIа къэпщытэныгъэхэм кърикIуа­хэм.
ВидеозэIущIэм щхьэхуэу щыхэплъащ лэжьапщIэхэм ику иту зэрыхагъэхъуэнум ехьэлIа Iуэхухэм, апхуэдэуи къэралым щып­сэу дэтхэнэми и хэхъуэр нэхъыбэ щIыным теухуахэм.
Къэбэрдей-Балъкъэрым 2021 гъэм «Къа­­лэр ущыпсэуну тынш щIыныр» щIыналъэ проектым хыхьэу муниципальнэ щIы­налъэ 40-м зэIузэпэщ щащI цIыху зэхуэсыпIэ 34-рэ, фэтэр куэду зэхэт унэ­хэм я пщIантIэу 89-рэ. Псори зэхэту а лэжьыгъэхэм трагъэкIуэдэну хухахащ сом мелуан 236,9-рэ. Нобэм ирихьэлIэу лэ­жьыгъэхэр щызэфIэкIащ жылагъуэ зэхуэсыпIэу 9-мрэ пщIантIэ 27-мрэ.
Дызэрыт илъэсым и гъатхэпэ мазэм зэгурыIуэныгъэ зэращIылIащ Шэджэм къалэм щрагъэкIуэкIыну лэжьыгъэхэм ятеухуауэ. Ар къалэхэр зэIузэпэщ щIыным теухуа проект нэхъыфIхэр къыщыхах IV Урысейпсо зэпеуэм и «Къалэ мыинхэр» Iыхьэм щытекIуауэ щытащ. Лэжьыгъэхэр и гуащIэгъуэу йокIуэкI, илъэс дызэрытым и кIэм яухын хуейуи къапэщытщ. Мылъкуу абы сом мелуан 61-рэ хухахащ.
Къалэхэр зэIузэпэщ щIыным теухуа проект нэхъыфIхэр къыщыхахыну V Урысейпсо зэпеуэм, 2022 – 2023 гъэхэм ягъэ­зэщIэну лэжьыгъэхэр щаубзыхунум, ди щIыналъэм щыщу хагъэхьащ Прохладнэрэ Нарткъалэрэ. Зэпеуэр езыгъэкIуэкI къэрал комиссэм абы кърикIуахэр 2021 гъэм фокIадэм и 1-м хэIущIыIу ищIыну и мурадщ.
КъимыдэкIэ, мэлыжьыхьым и 26-м къыщыщIэдзауэ накъыгъэм и 30 пщIондэ ZA.GORODSREDA зыуэ щыт къэрал платформэм цIыхухэм Iэ щрагъэIэтащ, 2022 гъэм къриубыдэу зэIузэпэщ ящIыну нэхъ яфIэтэмэм щIыпIэхэр къыхрагъэхыу. Республикэм и къалитхум (Налшык, Бахъсэн, Прохладнэ, Май, Тырныауз) я цIыху зэхуэсыпIэ 23-м проектибл щытекIуауэ къалъытащ. IэIэтым хэтащ Къэбэрдей-Балъкъэрым щыпсэухэм ящыщу цIыху мин 60.