Быйылны март айындан бери республикада «Комплекс профилактических мероприятий «Стоматологическое просвещение –вся республика» деген ат бла жаш тёлю стоматологладан къуралгъан къауум ишлейди. Ол кеси да «Машук-2020» жаш тёлю форумда Росмолодежь грантха тийишли болгъан эди. Аны башламчысы эмда грант къоллу болгъан Х.М.Бербеков атлы КъМКъУ-ну стоматология эмда жаякъ-бет хирургия институтну аспиранты Аслан Шероговду.
Проект сабийлени эмда жаш адамланы тишлерин иги кесек заманнга дери тап халда сакълар ючюн, дайым тазалап туруугъа, санитар-гигиена амалланы хайырланыргъа эмда тиш ауруугъа къажау профилактика этиуге бурулупду. Аны автору, командасы бла бирге республиканы социал- билим берген бир къауум учрежденияларында болуп, тишлени гитче заманындан окъуна къалай сакъларгъа кереклисини юсюнден юлгюле да келтирип, хапар айтханды. Ала «Битеу жашауунгда ариу ышарып турурча» деген халкъла аралы сабий билим берген программагъа да тири къатышхандыла. Аны уа проектни партнёру –Россейни стоматология ассоциациясы, Т.Х.Тхазаплижев атлы республикалы стоматология ара къурагъанды.
КъМКъУ-ну башда айтылгъан институтунда ишлеген профессор-преподаватель къауумну, ординаторланы эмда студентлени хайырындан проектге къатышханла республиканы билим берген учрежденияларына барып, алада окъугъан къызчыкълагъа бла жашчыкълагъа тишлени гитче заманындан окъуна сакъларгъа эмда къалай сакъларгъа кереклисини юсюнден айтхандыла. Аланы ол дерслери эки кесекден къуралып бардырылгъандыла: билим бериу –юйретиу эмда практикалы иш. Аллай тюбешиулени кезиуюнде айтып юйретиу бла чекленип къалмай, врачла сабийлеге тематикалы мультфильмле кёргюзтгендиле, тишлени, ауузну къалай таза тутаргъа кереклисини юсюнден дерсле бергендиле, тюрлю-тюрлю оюнла бардыргъандыла. Ол ишлеринде ауузну, тишлени суратлары бла макетлени, суратланы хайырланнгандыла.
Тюрлю-тюрлю организацияланы башчыларыны кёп санда тилеклери бла байламлы аллай тюбешиуле тёреге айланнгандыла. Биринчи сентябрьден башлап ала дагъыда жангыртыллыкъдыла.
