Тюнене РФ-ни Президенти Владимир Путин къыралны инсанлары бла тюзюнлей эфирде ушакъ бардыргъанды. Быллай халда тюбешиу быйыл 18-чи кере къуралады, пандемия бла байламлы ол былтыр болмагъанды. Аны россейли теле эм радиоканалла тюзюнлей эфирде кёргюзтгендиле.
Къыралны оноучусуна соруула тюрлю-тюрлю болгъандыла – коронавирусха къажау вакцинациядан башлап, ич эм тыш политикагъа, Украина, Америка бла болумгъа, аш-суугъа багъала ёсгенлерине дери. Дагъыда кесини орунунда кимни кёргенини, Россейни келир кюню къаллай боллугъуну юслеринден сорууладан да къачмагъанды ол. Ушакъ 3 сагъат бла 42 минут баргъанды, аны кезиуюнде къыралны оноучусу 68 соруугъа жууап бергенди.
Битеу да бирге уа тюзюнлей эфирге къыралны инсанларындан миллион бла жарымдан аслам соруу келгенди. Аланы телефон бла (675 минг), СМС билдириуле жазып (339 минг), сайтда (1312 минг), мобильный приложенияда (106 минг), социальный сетьледе (342 минг) берирге онг болгъанды.
Тюбешиуню аллында Владимир Путин тюзюнлей эфирге келген соруулагъа барысына да жууапла берилликлерин чертгенди. «Бир соруу да эсленмей къаллыкъ тюйюлдю»,-дегенди ол.
Инсанланы асламын а коронавирусну жайылыуу, анга къажау вакцинация къайгъыртханды. Алагъа жууаплай, къыралны оноучусу вакцинацияны борчлу халда бардырыугъа къажау болгъанын айтханды. Алай, аны акъылына кёре, регионланы оночулары инсанланы къауумларына дарманны борчлу халда салдырыуну юсюнден оноу чыгъарыргъа эркиндиле. Ол законланы чеклеринде болгъанын айтханды.
Владимир Путин къыралда тёрт вакцина болгъанын, ала барысы да бирча хайырлылыкъларын кёргюзтгенлерин белгилегенди эмда кеси «Спутник V» дарманны салдыргъанын билдиргенди. Ол инсанланы вакцинагъа кёз къарамлары тюрлениригине ышаннганын, аурууну жаланда дарманны болушлугъу бла хорларгъа онг болгъанын да айтханды.
Коронавирусдан ауругъанланы реабилитацияларыны юсюнден да баргъанды сёз. Владимир Путин алгъын быллай жумушланы санаторийле толтургъанларын, алай бюгюнлюкде аланы асламы солуу юйлеча ишлегенлерин айтханды Ол къыралда коронавирусдан аурууланы реабилитациялары жаны бла система къураллыгъын энчи белгилегенди.
Ючюнчю классны окъуучусу уа жангы окъуу жылда дерсле къалай бардырыллыкъларын билирге сюйгенди: партала артында, огъесе онлайн халдамы. Къыралны башчысы оноу эпидемиология халгъа кёре чыгъарыллыгъын чертгенди.
Украина бла байламлы соруула тёлери болгъандыла дерчады. Путин Зеленский бла тюбеширге унарыкъмыды, деген соруугъа Путин Украинаны таматалары оноуну тыш къыраллагъа бергенлерин, алагъа башчылыкъны Америка этгенин айтханды. Болсада ол украинлыла къарындаш халкъ болгъанын чертгенди эмда Зеленский бла ушакъдан къачмагъанын белгилегенди.
Эквадордан келтирилген бананла къыралны ичинде ёсдюрюлген быхыдан учуз некдиле, аш-суугъа багъалагъа контрольну ким толтурады, деп да соргъандыла. Путин багъала битеу дунияда да ёсгенлерин, анга сылтаула кёп болгъанларын айтханды. Тышындан а Россейге картоф, быхы, кесибизде ёсдюрюлген тирлик жетмегени ючюн келтирилгенди. Багъала бал тузгъа, чёплеу жаугъа бютюнда ёсгендиле. «Къырал битеу бу затланы биледи, аланы эсде тутады»,-дегенди ол. Власть органла ёсюуню тохтатыу жаны бла мадарла этгенлерин белгилегенди.
Къурулуш материалла багъа болгъанларыны сылтауларыны юсюнден соруугъа жууаплай, Путин ол инфляцияны хатасыды, деп чертгенди – алгъын 4 процент болгъан эсе, энди 6 процентге жетгенди. Ёсюуню тохтатыр мурат бла Ара банк ставкаланы кётюргенди. Алай бла инфляция 5 процентге тюшеригине ышаннганын чертгенди ол.
Мал тутханлагъа налог кийириледи деген хапарланы ангылатырын да тилегендиле. Къыралны башчысы ол жыйыллыкъ тюйюлдю деп шарт айтханды.
Процент ставкала уллу болгъанлары, кредит къысха заманнга берилгени бизнесни айнытыргъа чырмагъанына да тарыкъгъандыла тюзюнлей эфирни кезиуюнде. Сургутдан предпринимательге жууаплай, Владимир Путин пандемияны кезиуюнде гитче эм орталыкъ бизнес уллу къоранчла сынагъанын белгилегенди. Алагъа болушлукъгъа правительство тийишли мадарла кийиргенди. Ол предпринимательни тилеги энчи тинтиллигин белгилегенди.
Регионланы башчылары да быллай тюзюнлей эфирле бардырсала хайырлы боллугъун да айтханды Путин сорууладан бирине жууаплай. «Быллай жумушла магъаналыдыла. Адамларыбыз къайгъыларын билдиредиле, аны блла бирге уа жеринде жарсыула ачыкъланадыла»,-дегенди ол.
Къуллукъдан эркин болгъандан сора къайда ишлериксиз деген соруугъа уа Путин: «Ол кезиуде ким ишлейди, печьде жатып турлукъма»,-деп лакъырда этгенди.
Кесини орунуна къыралны башчысыны къуллугъунда кимни кёргенин да айтханды: «Президент болургъа сюйген адамлагъа болушлукъда кёреме кесими жууаплылыгъымы. Заман келсе, ма бу адам деменгили Россейге башчылыкъ эталлыкъды дерикме деп ышанама. Болсада Россейге ким оноу этеригин къыралны халкъы сайларыкъды»,-дегенди ол.
Дагъыда тюбешиуде хыйлачыла адамланы алдап, банк карталарындан ахчаларын урлагъанларыны, эллеге табийгъат газ, ичер суу тартыуну, тыш къыраллы сайтланы бла социал сетьлени Россейде ишлерине чек салыуну, школланы бла сабий садланы мекямларын жангыртыуну, саулукъларына кёре чекленнген онглары болгъанланы реабилитация техника бла хакъсыз жалчытыуну юслеринден да соргъандыла.
Россейни келир кюню къаллайды, деп да соргъандыла. Владимир Путин Россей дуния башында жерине кёре кенг, табийгъат онгларына кёре уа бай къырал болгъанын чертгенди. Алай эм уллу байлыкъ адамладыла, дегенди ол. «Халкъны тарыхы байды, ол а шёндюгю заманда артыкъда магъаналыды. Россейни ичинде жашау ышаннгылы болса, биз салгъан муратларыбызны толтураллыкъбыз»,-дегенди ол.
