Къабарты-Малкъарны Башчысы Казбек Коков Районла аралы кёп профильли больницаны (ММБ) Лескен бёлюмюнде ишчи жолоучулукъда болгъанды. Республиканы оноучусу КъМР-ни Минздравы «Саулукъ сакълау» миллет проектни чегинде сатып алгъан жангы энчиленнген медицина автотранспортха къарагъанды. Техника болжал халда ММБ-ны тийресинде орналыпды, жууукъ заманда ол медучреждениялагъа ётдюрюллюкдю.
Жангы жеринден тепдирилген флюорографла Бахсан шахар округну эм Бахсан районну, Чегем, Черек, Терк районланы ара район больницаларына берилликдиле, маммографла – Прохладна шахар округну эм Прохладна районну Ара район больницасына эм ММБ-гъа. Медицина техника узакъ элледе халкъны диспансеризациясына эм туберкулёз тинтиулени бардырыугъа хайырланырыкъды.
Андан сора да, Казбек Коков прививка салгъан кабинетни ишине да эс бургъанды. Врачланы айтыуларына кёре, ахыр ыйыкълада дарман салдырыргъа сюйгенлени саны ёсгенди, кюн сайын ол мурат бла бери сексенден артыкъ адам келеди.
Жолоучулукъну чегинде ММБ-ны Лескен бёлюмюню мурдорунда Казбек Коковну эм къоркъуулу жукъгъан ауруулагъа бакъгъан госпитальланы тамата врачлары бла тюбешиую къуралгъанды. Ушакъгъа 1-чи номерли ГКБ-ны тамата врачы Анзор Кумышев, 2-чи номерли ГКБ-ны тамата врачы Тогъузаланы Залина, ММБ-дан Фатима Хачетлова, А.А. Хацуков атлы ЦРБ-дан Елена Кокова, Прохладна шахар округну эм Прохладна районну Ара район больницасындан Зита Шомахова, Терк районда ЦРБ-дан Залим Баксаноков къатышхандыла.
Тамата врачла республиканы оноучусуна «жол картагъа» тийишлиликде госпитальланы ауругъанла кёбейселе саусузланы алыргъа хазырлыкъларыны юсюнден айтхандыла. Специалистле белгилегенлерича, аурууну азайгъан кезиуюнде, коронавирус бла кюреш сынам алырча, ала уллу москвалы эм тыш къыраллы ковидге къажау иш бардыргъан клиникалада болгъандыла.
Анзор Кумышев былтыр бла тенглешдиргенде ауур саусузланы саны ёсгенин, реанимация болушлукъ излегенлени саны кёбейгенин белгилегенди. Больница телемедицина технологияланы болушлукълары бла ауур саусуз чыкъгъан чакълада ковидге къажау иш бардыргъан уллу араладан консультацияла алгъанларын да айтханды ол. Елена Кокова къошакъ халда медицина жатар жерле къуралгъанларын билдиргенди, Зита Шомахова дезинфикаторну алыуну эм тохташдырыуну юсюнден хапарлагъанды.
Сёлешиуге къошулгъанланы хар бири регионну таматасына кеслерини оноуларында болгъан госпитальланы ишлерини юсюнден айтхандыла. Ала Казбек Коковха саулукъ сакълау соруулагъа эс бургъанлай тургъаны, ишлеринде тыйгъычла болмазча къайгъыргъаны ючюн ыразылыкъларын билдиргендиле.
КъМР-ни саулукъ сакълау министри Рустам Калибатов госпитальланы акушер бёлюмлерини ишлерин энчилегенди, ала 2020-2021 жыллада коронавирус жукъгъан ауруудан къыйналгъан неда анга ишеклилик чыкъгъан ауурлукълары болгъан эм сабий тапхан тиширыуланы алгъанлай тургъандыла. Акушер бёлюмлени ишлерини хайырындан пандемияны кезиуюнде ана ауушхан бир болум да тюбемегенди.
Республиканы Башчысы тамата врачлагъа ыразылыгъын билдиргенди, сёлешиуню эсеплерине кёре КъМР-ни Минздравына бир къауум соруугъа къараргъа буюргъанды. Ол саулукъ сакълау жаны бла къураучу оноуланы жашаугъа кийиргенде госпитальланы таматаларыны практика сынамлары эсге алыныргъа тийишлисин энчи чертгенди. «Бюгюнлюкде бизге адамларыбызны жашаулары эм саулукълары бек магъаналыдыла, аны себепли къыралда эм дунияда болумгъа эс буруп, къоркъуулу вирусну юсюнде сынамыбызны эм жангы билимибизни хайырланып, алгъадан кёре билирге керекбиз эм аурууну кёбейирге боллугъуна хазырланыргъа», - деп эсеплегенди Казбек Коков.
