Урысей Федерацэм и Президент Путин Владимир дыгъуасэ, мэ­къуауэгъуэм и 30-м, теленэтын зан­щIэмкIэ жэуап яритащ ди къэ­ралым и цIыхухэм кърата уп­щIэ­хэм. УФ-м и «Япэ», «Россия 1», НТВ, «Мир» канал нэхъыщхьэхэм къызэрагъэпэща теленэтын зан­щIэм щIидзэн ипэ редакцэхэм ­къагъэхьа упщIэхэм я бжыгъэр мелуанитIым нэсат. Ахэр къэрал Iэтащхьэм къыхуагъэхьыжащ къэп­салъэурэ ирагъэтхауэ, телефонхэм хэт SMS, MMS Iэмалхэр къагъэсэбэпу, «Москва-Путину» сайтымкIэ, Интернетым щыIэ «Вконтакте», «Одноклассники», нэ­гъуэщI социальнэ гупхэм иралъ­хьэурэ. Нэтын занщIэр ирагъэкIуэкIащ ди къэралым и те­лежурналист цIэрыIуэхэу Березовская Екатеринэрэ и Аскер-заде Наилярэ. Колл-центрым щы­лэжьащ Ремезовэ Татьянэрэ Юрье­вэ Натальерэ.

Фигу къэдгъэкIыжынщи, зи гугъу тщIы эфир занщIэм хуэдэ (18-нэу мы гъэм ар йокIуэкI) нэгъабэ щи­гъэIакъым къэралым и Iэтащ­хьэм, коронавирус уз зэрыцIалэ лIэу­жьыгъуэщIэр ди хэкуми къэсауэ зэрыщытам папщIэ. Президентым цIыху нэхъыбэм я упщIэм жэуап яритыну хущIэкъуащ. Псори зэгъу­сэу къапщтэмэ, сыхьэти 4-м къриубыдэу ар тепсэлъыхьыфащ гъащIэм и лъэныкъуэ зэмылIэужьы­гъуэ куэдым - упщIэ 80-м нэс. Абыхэм къахэбгъэщхьэхукI хъунущ ко­ронавирусымрэ абы зыщыхъу­мэным хуэщIа вакцинэхэмрэ ехьэ­лIахэр. Апхуэдэу цIыхухэр егъэпIейтей медицинэ IэнатIэм щызэфIах Iуэхутхьэбзэхэм я фIагъым, хущ­хъуэхэр пщIэншэу тыным, псэупIэ унэхэр ухуэным епхахэми.
Мыгъэрей «зэIущIэр» щыты­кIэ­щIэм иту къызэрагъэпэщащ. Абы кърагъэблэгъакъым IэщIагъэлIхэр, еджагъэшхуэхэр, политикхэр. Уп­щIэ­хэм я нэхъыбэр езы Iэтащхьэм къыхихащ, нэтыныр езыгъэкIуэкI­хэр и дэIэпыкъуэгъуу.
Вакцинэхэр хэлъхьэныр Iэмалын­шэу щытрэ щхьэж зэрыхуейуэ ищIын­рэ Iуэхум щытепсэлъыхьым, Путиным жиIащ цIыхухэм уз зэ­ры­цIалэм пэщIэтын мастэхэр зыхрагъэлъхьэныр ди къэралым 1998 гъэм къыщыдэкIауэ щыта «УФ-м щыпсэухэр уз зэрыцIалэхэм зэры­щыхъумэн хуейм теухуауэ» хабзэм тетыныр зэрыфIэтэмыр къитIасэу зэ­рыщытыр. Абы къызэрыщыгъэ­лъэгъуауэ, цIыхубэм Iэмал имыIэу халъхьэн хуей вакцинэхэр щыIэщ. Абы храгъэубыдакъым коронавирусым зыщыхъумэным хуэщIа мастэр. АтIэми, щытыкIэр шына­гъуэ хъурэ, узыфэ зэрыцIалэм зи­убгъумэ, а хабзэ дыдэм зэритым­-кIэ, мастэ хэлъхьэныр Iэмалыншэ мэхъу хэт и дежкIи. Апхуэдэ щытыкIэ щыщыIэщ ди къэралым хыхьэ язы­ныкъуэ щIыналъэхэм. А щIыналъэхэм зэрыщаубзыхуам ипкъ иткIэ, Iэмал имыIэу мастэхэр зыхрагъэлъхьэпхъэщ медицинэ лэжьакIуэхэм, цIыхухэм, псом хуэмыдэу сабийхэм ядэлажьэхэм, нэгъуэщI­хэми.
Путиным зэрыжиIамкIэ, езыми зыхригъэлъхьащ Спутник V вакци­нэр, адрейхэми чэнджэщ яритащ апхуэдэ щIыкIэкIэ коронавирус уз зэрыцIалэ лIэужьыгъуэщIэм зыщахъумэну.
- Дэ дрогушхуэ икIи дропагэ узыфэ хьэлъэу дызытепсэлъыхьым цIыхур щызыхъумэфын вакцинэ лIэужьыгъуиплI ди щIэныгъэлIхэм зэман кIэщIым къриубыдэу къызэ­рагупсысам, ахэр къыдагъэкIыу зэрыхуежьам, - къыхигъэщащ абы. - Псори фыкъыхузоджэ абыхэм ящыщ зыхевгъэлъхьэну. Псори зытещIыхьыжар цIыхубэм я узыншагъэр, гъащIэр хъума хъунырщ.
Къэралым и Президентым ирата упщIэхэм ящыщт Урысей Феде­рацэр хамэ къэралхэм зэрахущы­тыр, ядригъэкIуэкI политикэр зыубзыхухэри. Путиныр хэхауэ тепсэ­лъы­хьащ къуэш пэлъытэу игъащIэ лъандэрэ дыкъызыдекIуэкIыу щы­-та Украинэм. Ди къэралыр дапщэщи хьэзырщ а гъунэгъу щIыналъэм дэлэжьэну, мамырыгъэмрэ зэгуры­уэныгъэмрэ и тегъэщIапIэу.
ЦIыхухэм яIэ упщIэхэм къыщаIэтащ ерыскъыпхъэхэм я уасэхэр зэ­рыхэхъуэр. Апхуэдэхэт, къапщтэмэ, Iэмалыншэу унагъуэр зыхуей ерыскъыпхъэу гъэшыр, хадэхэкI зэ­мы­лIэужьыгъуэхэр лъапIэ зэрыхъуар. Абы и щхьэусыгъуэр, Путиным зэ­рыжиIамкIэ, къэралым апхуэдэ ерыс­къыпхъэу къыщалэжьахэр зэ­рагугъам нэхърэ нэхъ мащIэу ­къы­зэрыщIэкIаращ. Мыгъэрейхэр ­кърахьэлIэжмэ, Iуэхур нэхъ тэмэм хъунущ, къызэрыхигъэщамкIэ. Ап­хуэдэу Путин Владимир къытеувыIащ Кавказ Ищхъэрэм Iэщ лъэпкъыфIхэр щыгъэбэгъуэжыным ехьэлIа лэжьыгъэхэр къызэщIэрыгъэуэжыным яужь зэритыр. Iэщхэм я бжыгъэм теухуа налогхэр ягъэувын хуэдэу зэрагъэхъыбарри лъабжьэншэу зэрыщытри къыхигъэщащ.
«Лэжьыгъэм и ветеран» цIэ лъапIэм щхьэкIэ ят хабзэ ахъшэр зэ­рыIуахыжамкIэ мыарэзыуэ Пути­ным зыкъыпызыщIа цIыхухъум ­къэ­рал унафэщIым ирита жэуапым ­гугъэ уегъэщI апхуэдэ Iуэху еп­лъы­кIэм щIыналъэхэм фIыкIэ зыщрагъэхъуэжыну. ЦIыхум къилэжьа пщIэр апхуэдэу IэщIэхыжыныр тэ­мэ­му къызэримылъытэри къыхигъэщащ абы.
Теленэтын занщIэм нэгъуэщI Iуэхугъуэ куэдми щытепсэлъыхьащ. Зэпсэлъэныгъэм жыджэру хэтащ цIыхухъухэри бзылъхугъэхэри, къу­лыкъущIэхэри IэщIагъэлIхэри, лэ­жьакIуэжьхэри унэгуащэхэри, ба­лигъхэри ныбжьыщIэхэри. Къэралым хыхьэ щIыналъэ куэдым щып­сэухэм Iэмал ягъуэтащ я жьэ хуэзэу УнафэщIым епсэлъэну, я гукъеуэхэр хуаIуэтэну. УпщIэхэр ехьэлIат фэтэрхэр, уней унэхэр щэн-къэщэ­хуным епха хабзэхэм, къэралым Интернетым нэхъри зыщегъэужьы­нымрэ абы хэлъ щхьэхуэныгъэ­хэмрэ, 2021 - 2022 гъэ еджэгъуэ­щIэр зэрыщIадзэжыну щIыкIэм, хьэ­рычэтыщIэ мащIэмрэ ику итым­рэ зэрызегъэужьыпхъэ мардэхэм­-рэ абыхэм кърат кредитхэм техуэ процентхэмрэ я куэдагъымрэ, хэку туризмым и лъапIагъым, къэрал гъуэгухэм я щытыкIэм, транспортым и лэжьэкIэм коронавирусым зы­щиубгъуа лъэхъэнэм къэралым и экономикэ IэнатIэхэм яIа хэщIы­ныгъэхэмрэ ахэр зытеувэжын пап­щIэ къэралым ярита дэIэпыкъу­ныгъэмрэ. КъаIэтащ псэупIэ унэ­хэм, лъапсэхэм, цIыху куэд зыхэт уней хозяйствэ зэгухьэныгъэхэм  газ бэIутIэIуншэу ешэлIэным, коммунальнэ Iуэхутхьэбзэхэм щIат ахъ­шэхэм хэхъуэ зэпыту, абыхэм куэд зэрыпэмылъэщым, бын зыпI уна­гъуэхэм иратыну къэралым щагъэува ахъшэхэр тэмэму зэрамытым, нэгъуэщI Iуэхухэми ехьэлIа уп­щIэ­хэр. Къыхэгъэщыпхъэщ щытыкIэ хьэлъэм ихуа бзылъхугъэ уэндэгъу­хэм нобэ, бадзэуэгъуэм и 1-м къы­щы­щIэдзауэ, ахъшэ хэхахэр зэрыра­тынур. Путиным зэрыжиIамкIэ, къэ­ралым и дежкIэ мыхьэнэшхуэ зиIэ, щIэблэ узыншэ къытщIэхъуэным хуэгъэпса а Iуэхум мы гъэм и за­къуэ хухахащ сом мелард 46-м ­щIигъу.
Къэралым щыпсэухэм ящыщ куэд зыгъэгузавэхэм ящыщщ те­лефонкIэ финанс щIэпхъаджагъэ­хэр зылэжь цIыху икIэхэм зэфIах хьэгъэщагъэхэр. Зи хъумапIэ картэхэм ахъшэхэр икIуэдыкIхэр куэд мэхъури, дапщэщи сакъын зэры­хуейр къыхигъэщащ Путиным. ­УФ-м щыщыIэ хабзэхэм япкъ иткIэ, МВД-м, ЦБ-м къепха хабзэхъумэ ­IэнатIэхэм я IэщIагъэлIхэр нэхъ ткIийуэ кIэлъыплъу хуежьащ банкым щахъумэ мылъкур зейхэм зэ­ры­зэрагъакIуэм, дзыхь зытрамы­щIэ гуэр щыIэмэ, занщIэу Iуэху ящIу.
- Мыпхуэдэ зэIущIэхэм мыхьэнэшхуэ яIэщ цIыхухэр зыгъэпIейтей Iуэхугъуэхэр нэхъ наIуэ къэщIынымкIэ, сыту жыпIэмэ абыхэм епхауэ щытщ ди къэралым щекIуэкI социальнэ, экономикэ политикэр, - жиIащ эфир занщIэм и кIэухыу Путин Владимир. - Мы жыпхъэм ит лэжьыгъэм гулъытэ хэха хуащIыну сыхуейщ УФ-м хыхьэ щIыналъэхэм я Iэтащхьэхэм. Апхуэдэущ къызэ­ры­тхуэщIэнур жылагъуэм щызекIуэ гупсысэхэр, мурадхэр, унафэщIхэр дызэлэжьыпхъэ унэтIыныгъэхэр.
Теленэтын занщIэм и кIэухым Путин Владимир фIыщIэ яхуищIащ Iуэхум хэта псоми: студием щылэ­жьахэми, упщIэхэр зытха, абыхэм елэжьа волонтёрхэми, лэжьыгъэм къыхыхьа IэщIагъэлIхэми.
- Жэуап зэста упщIхэр куэд хъу­ми, къэнахэр нэхъыбэжщ. Ауэ, фи фIэщ фщIы, зы упщIи лъэныкъуэегъэзу къэнэнукъым, дэтхэнэми ­гулъытэ ягъуэтынущ. УпщIэу къыт­Iэ­рых­ьахэм ящыщу мин 500-м щIигъум жэуап еттакIэщ, Iуэху гуэрхэри зэфIэкIащ, адрейхэми дыхэплъэнущ, зэпкърытхынущ, Правитель­ст­вэр абыхэм елэжьынущ. ФIым ды­щыгугъыу, къэралым щызекIуэ хабзэхэм демыбакъуэу дызэрыпсэунум дэтхэнэри дыхущIэкъун хуейщ, - жиIащ къэрал унафэщIым.