Нальчик шахар округну Жер-жерли самоуправление советини кезиулю жыйылыуунда кёп тюрлю жумушла сюзюлгендиле. Аны ишине шахар округну башчысы Игорь Муравьёв, мэр Таймураз Ахохов, шахарны прокуроруну къуллугъун толтургъан Аслан Каншаов, муниципал депутатла эм башхала къатышхандыла, деп билдиргендиле мэриядан.
Айтханыбызча, кенгешде бир ненча тема кётюрюлгенди. Ол санда: Жер-жерли самоуправление советге депутатланы айырыу, шахар округну Уставына тюрлениуле кийириу, 1374 китапны къыралны иелигинден муниципалитетге кёчюрюу. Дагъыда Советни 2007 жылда 16-чы февральда чыгъарылгъан оноуу кючюн тас этгенин къабыл кёргендиле. Сёз анда жер-жерли администрацияны коммунал комплексни организацияларыны тарифлерин эмда ала жыйгъан къошакъ тёлеулени ёлчемин тюрлендирирге эркинлигини юсюнден бара эди.
Темаладан энтта да бири - Идаров атлы орамда кёпюрден башлап шахарны Владикавказ жолгъа жетген жерде чегине дери созулгъан орамны атын тюрлендириудю.
Шахар округну контроль-эсеплеу палатасыны былтыргъы ишини эсеплери бла аны башчысы Керим Маремшаов шагъырейлендиргенди. Былтыр жылыу бериу кезиу къалай ётгенини эмда шахарны мюлкюн быйыл кюзде бла къышда ишлеуге хазырлау нечик баргъаныны юсюнден а мэрни орунбасары Анатолий Тонконог хапарлагъанды.
Билим бериу учреждениялада аш бериу къалай къуралгъанына энчи эс бурулгъанды. Анда болум бла жыйылгъанланы администрацияны билим бериу департаментини таматасы Фатимат Оганезова шагъырейлендиргенди. Ол тинтиулени кезиуюнде къаллай кемчиликле табылгъанын билдиргенди эмда аланы кетериу, бузукълукъ этгенлени жууапха тартыу жаны бла не мадар этилгенин да айтханды.
Таймураз Ахохов ахырында быллай тинтиулени качествосуна бютюнда сакъ болургъа, бузукълукъла арталлыда болмаз ючюн аланы асламыракъ бардырыргъа чакъыргъанды.
