КъМР-ни Парламентини президиумуну кезиулю жыйылыууну «правительстволу сагъатында» «КъМР-де туризм бла байламлы ишни юсюнден» закон къалай толтурулгъаны сюзюлгенди. Жыйылыуну спикер Татьяна Егорова бардыргъанды.
КъМР-ни Курортла эм туризм министри Мурат Шогенцуков белгиленнген закон республикада туризмни айнытыугъа себеплик этгенин чертгенди, анда солугъанланы къоркъуусузлукъларын жалчытыу, жамауатны саулугъун игилендириу жаны бла мадарла белгиленнгенлерин айтханды. Аны бла бирге уа документде табийгъат эм тарых эсгертмелени аяулу хайырланыуну жорукълары да бардыла.
- Туристлени къоркъуусузлукъларын жалчытыу жумушланы чеклеринде министерство Парламентни Физкультура, спорт эм туризм жаны бла комитети бла бирге РФ-ни Административ бузукълукъланы кодексине тюзетиуле хазырлагъанды. Анда къыйын жерледе маршрутлагъа чыкъгъанда МЧС-ни бёлюмлерине белгили этиуню низамын бузгъанла къаллай жууапха тартылгъанлары белгиленеди,-дегенди министр. Андан сора да, республикалы законнга экскурсоводланы, гидлени, инструкторланы ишлерин право бла жалчытырча тюзетиуле хазырланадыла.
Мурат Шогенцуков белгили этген шартлагъа кёре, бюгюнлюкде республиканы курорт-рекреация объектлерини саны 200-ден асламды. Битеу да бирге 11 турист-рекреация жер барды. Аладан «Нальчик» курортха, Минги тауну тийресине, Жылы-Суугъа бла Чирик кёллеге сейир уллуду.
Былтыр республикада 540 минг адам солугъанын да билдиргенди докладчы. Ол а 2019 жылдан 10 процентге азды. Къонакъланы саны пандемия ючюн кийирилген чекле бла байламлы азайгъанын да айтханды докладчы. Республиканы турист комплекси коронавирус жайылгъан кезиуде къоранчла сынагъанланы санына кийирилгенди, анга къырал себеплик этгенди.
Быйылны биринчи кварталында уа туристлени саны кёбейгенин белгилерчады. Анга уа федерал даражада Къабарты-Малкъарны солуу онгларын белгили этиу жаны бла кампания себеплик этгенди.
Сёз жууукъ кезиуде жашауда бардырыргъа белгиленнген проектлени юслеринден да баргъанды. Мурат Шогенцуков «Жылы-Суу» тау-лыжа рекреация бальнеология комплексни бла «Баш Чирик кёлле» рекреация кластерни «Экономиканы айнытыу эм инновация экономика» федерал къырал программагъа къошаргъа боллугъун чертгенди.
Министр «Атажукин парк» рекреация кластерни айнытыугъа да эс бургъанды. Инвестиция проектни чеклеринде уа къонакъ юйле, кафеле, сервис предприятияла къураргъа белгиленеди.
Доклад этип бошагъандан сора, Мурат Шогенцуков Татьяна Егоровагъа Къабарты-Малкъарны саугъагъа берирча продукциясына салынырыкъ белгини бла сувенирни бергенди.
Докладчыгъа соруула да болгъандыла. Татьяна Борисовна санаторийлени болумларыны, коронавирус бла байламлы хал осалгъа кетсе, туристлени саны къалай тюрленирге боллугъун билирге сюйгенди.
Министрни айтханына кёре, классификациядан тёрт санаторий ётгенди, алагъа тёрт «жулдуз» категория берилгенди. Мурат Шогенцуковну оюмуна кёре, жылны ахырына дери республикагъа келген туристлени саны 15 процентге ёсерикди (2019 жыл бла тенглешдиргенде).
Спикерни орунбасары Жанатайланы Салим, алгъын кезиуде тау туризм жаны бла инструкторланы хазырлагъан факультет болгъанын эсгертип, аны жангыртыр амал болгъанын бла къалгъанын соргъанды.
- «РФ-де туризм бла байламлы ишни юсюнден» федерал законнга тюзетиуле кийирилгендиле, алай бла уа гидлеге сертификатла берилликдиле. Алай профессионал билими болмагъанла аны алаллыкъ тюйюлдюле,- деп билдиргенди министр.
Жарыкъландырыу, илму эм жаш тёлюню ишлери жаны бла комитетни башчысы Нина Емузова сабий туризмни айнытыу, дагъыда турист-информация араны къурау жаны бла болумну соргъанды.
Мурат Шогенцуков сабийлени солууларын къурагъан организацияла ишлегенлерин чертгенди, порталны ачыугъа уа ведомство баш магъана береди. Бюгюнлюкде туризм рынокну социал сетьледе кенг белгили этиу жаны бла мадарла толтуруладыла.
Жыйылыуда сюзюлген сорууланы эсге алып, президиум эсгертиулени къабыл кёргенди.
***
Ызы бла депутатла законланы проектлерин сюзгендиле. «Таксиледе адамланы жюрютюуге бла жюклени ташыугъа контрольну тамамлауну низамыны юсюнден» республикалы закон кючюн тас этгени жаны бла законопроект сюзюлгенди. «Физкультура эм спорт сферада болумланы бир низамгъа келтириуню юсюнден» законнга кёргюзтюлген тюзетиулеге къаралгъанды.
Парламентарийле кюз арты сессияда ишлерини планын да сюзгендиле, башха регионлада коллегаларыны законодательный башламчылыкъларын да тинтгендиле.