КъБР-м и Парламентым щызэIущIащ Пашэхэм «Кавказым и къуэ­кIуэнур» я щIыналъэ зэхуаку клу­бым хэтхэмрэ МГИМО-м Дунейпсо къэхутэныгъэхэмкIэ и институтым Евро-атлантикэ шынагъуэншагъэмкIэ и центрым и щIэныгъэ ­лэ­жьакIуэ нэхъыщхьэ, Горчаков А.М. и цIэр зезыхьэ ЦIыхубэ дипломатием зыщIэгъэкъуэнымкIэ фондым и эксперт Маркендонов Сергейрэ.
ЗэIущIэм хэтащ КъБР-м и Пар­ламентым и УнафэщI Егоровэ Татьянэ, УФ-м и Президентым и пол­номочнэ лIыкIуэу КИФЩI-м щы­Iэм жылагъуэ проектхэр гъэзэ­щIэнымкIэ и департаментым и ­эксперт Самофаловэ Светланэ, Гор­чаков А.М. и цIэр зезыхьэ ЦIыхубэ ­дипломатием зыщIэгъэкъуэнымкIэ фондым и программэхэм я унафэщI Карслиевэ Викторие.
Къызэхуэсахэм фIэхъус ярихащ Егоровэ Татьянэ:
- Нобэ КъБР-м и Парламентым и хьэщIэщ Пашэхэм «Кавказым и ­къуэкIуэнур» я щIыналъэ зэхуаку клубым хэтхэр. Къыхэгъэщыпхъэщ, «Урысейм и пашэхэр» къэралпсо зэхьэзэхуэм, щIалэгъуалэ зэхы­хьэ­хэм, IэщIагъэлIхэм я зэпеуэхэм къы­щыхэжаныкI псори а зэгу­хьэ­ныгъэм зэрызригъэуIужыр. Ди ­гуапэщ клу­бым КъБР-м и Парламентым и ЩIалэгъуалэ палатэм и лIыкIуэхэри зэрыхэтыр. Абы и лэ­жьыгъэм мыхьэнэшхуэ иIэщ, фи зэфIэкIхэм ­нэгъуэщIхэр хэвгъэ­гъуэзэну, гуп зэдэлэжьэкIэм евгъэ­сэну Iэмал ­ягъуэтри. Кавказым, Урысей псом я къэкIуэнур зыхуэ­дэнур абы елъытащ. Сыхуейт фи къарур псом япэу ди деж, щIыналъэм и гупсысэ, гъэ­сэныгъэ, Iуэху еплъыкIэ къэлъытауэ, къыщывгъэсэбэпыну.
КъБР-м и Парламентым и Уна­фэщIым къызэхуэсахэм гу лъаригъэтащ клубым зэпымыууэ УФ-м и ­Президентым и полномочнэ лIы­-­кIуэу КИФЩI-м щыIэм и Аппаратыр дэIэпыкъуэгъу къызэрыхуэхъур.
- Абы къегъэлъагъуэ езы зэгухьэ­ныгъэми хэт дэтхэнэми зэрефIэкIуэну Iэмал зэриIэнур. Ар лъабжьэфIу вгъуэтащи, фи ехъулIэныгъэхэр щы­хьэт тохъуэ. ИкъукIэ мыхьэнэшхуэ иIэщ политикэм, щIэныгъэм, щэн­хабзэм щылажьэ цIыху цIэрыIуэхэм фадэлажьэу фи зэфIэкIыр щIэвгъэбыдэжыным. Абы и лъэныкъуэ­кIи полномочнэ IуэхущIапIэр дэIэ­пыкъуэгъу ин къызэрыфхуэхъур ­хьэкъщ, - пищащ Егоровэм.
ЖиIам и щапхъэу Егоровэ Татьянэ къигъэлъэгъуащ политолог цIэрыIуэ, лъэпкъ политикэ IуэхухэмкIэ IэщIагъэлIышхуэ Маркедонов Сергей зэраIущIар.
- Си фIэщ мэхъу нобэрей зэIущIэр гъэщIэгъуэн икIи купщIафIэ зэры­хъунур, «Кавказым и къэкIуэнур» ­зэгухьэныгъэмрэ дэрэ ди зэдэлэ­жьэныгъэми адэкIэ зэрызедгъэу­жьынур. ЩIалэгъуалэм сыхуейт ­сехъуэхъуну ехъулIэныгъэфIхэр яIэну, - дыщIигъуащ Егоровэм.
Самофаловэ Светланэ жиIащ Кав­каз Ищхъэрэм IэщIагъэлIхэр щы­гъэхьэзырынымрэ зэфIэкI зиIэ щIалэгъуалэм гъуэгу етынымрэ ­гулъытэ ин зэрыхуищIыр УФ-м и Президентым и полномочнэ лIы­-кIуэу КИФЩI-м щыIэ Чайкэ Юрий. Апхуэдэуи къыхигъэщащ клубым и зэIущIэхэм къулыкъущIэхэр зэры­хэтым и фIыгъэкIэ щIалэгъуалэми хуэмурэ къэралым и жылагъуэ-­политикэ Iуэхухэм нэхъ куууэ зыхагъэгъуэзэн зэрыщIадзэр.
Маркедонов Сергей тепсэлъыхьащ Кавказ Ищхъэрэм и щIыналъэхэм къыщекIуэкI политикэм, Урысейм и къэрал Iуэхухэм Кавказым щигъэ­защIэ увыпIэм. КъищынэмыщIауэ, хьэщIэр къытеувыIащ осетинхэмрэ ингушхэмрэ, куржыхэмрэ ипщэ ­осетинхэмрэ, куржыхэмрэ абхъазхэмрэ я зэпэщIэувэныгъэр, шэшэн зауэхэр къыщIежьам теухуауэ иIэ Iуэху еплъыкIэхэм.
Гу зылъытапхъэ: Пашэхэм «Кавказым и къуэкIуэнур» я щIыналъэ зэхуаку клубым и лэжьыгъэр къы­зэрегъэпэщ Президент саугъэтхэмкIэ фондым и дэIэпыкъуныгъэкIэ. ­Зэгухьэныгъэм щIэх-щIэхыурэ Кавказ Ищхъэрэм и щIыналъэ зэ­мы­лIэужьыгъуэхэм щрегъэкIуэкI цIыху жыджэрхэр щызэхуэс зэIущIэхэр. Клубым хэтхэм мэлы­жьы­хьым Пя­тигорск къыщызэрагъэпэща зэIущIэм ирагъэблэгъащ УФ-м и Пре­зидентым Граждан жыла­гъуэмрэ цIыхум и хуитыныгъэхэмрэ зегъэу­жьынымкIэ и советым и уна­фэщI Фадеев Валерий. Накъыгъэм ахэр IущIащ УФ-м и Жылагъуэ па­латэм и секретарь Михеевэ Лидие, мэкъуа­уэгъуэм - политолог, «Петербург ­политикэ фондым» и унафэщI Виноградов Михаил.
Зэгухьэныгъэм и мурад нэхъыщ­хьэр IэщIагъэлIхэр гъэхьэ­зыры­ным­рэ Кавказ Ищхъэрэм псэукIэр щегъэфIэкIуэным хуэгъэпса жэрдэм­хэр ядэIыгъынымрэщ.