КъМР-ни Башчысы Казбек Коков жашау журтла ишлеуде этилген муратлагъа жетиуге эмда регионланы инфраструктураларын айнытыугъа жораланнган битеуроссей семинар-кенгешге къатышханды.  Жыйылыуну РФ-ни Правительствосу Къырал советни Къурулуш, жашау журтла-коммунал мюлк, шахар жашау жаны бла комиссиясы бла бирге Россейни Президенти салгъан миллет борчланы толтурургъа себеплик этерик амалланы табар мурат бла къурагъанды.
Кенгешге РФ-ни Президентини Администрациясыны башчысыны биринчи орунбасары Сергей Кириенко, Россейни Правительствосуну Председателини орунбасары Марат Хуснуллин, РФ-ни Президентини болушлукъчусу, Къырал советни секретары Игорь Левитин, федерал эмда регион власть органланы башчылары къатышхандыла.
     Жыйылгъанланы алгъышлап Сергей Кириенко сёлешгенди. Ол къурулушда бла инфраструктураны айнытыуда бек алгъа тамамланыллыкъ ишлени юсюнден айтханды. Ала быладыла: жыл сайын 5 миллион юйюрню жашау болумларын игилендирирге, жангы ишленнген жашау юйлени 2030 жылгъа  120 миллион квадрат метрге дери жетдирирге эмда шахарда ырахат  болумну къураргъа. Сергей Кириенко  салыннган борчланы толтурууда регионланы магъаналары уллу болгъанын чертгенди эмда семинаргъа къатышханлагъа жетишимле тежегенди.
Марат Хуснуллин а Правительствогъа бла губернаторлагъа салыннган баш борчланы туура этгенди: шахарлада тынчлыкълы болумла къураргъа эмда алада жашагъанланы жашау къолайлыкъларын бла къоркъуусузлукъларын игилендирирге.
Къыралны саулай айнытыуну баш мадарларындан бирине вице-премьер жашау журтланы алыргъа кимни да къолундан келирча этиуню санагъанды. Аны ючюн а льготалы ипотеканы, энчи иели юйлени къурулушларын, жер-жерлени комплекс халда айнытыуну, оюла тургъан юйледен кёчюрюуню жангы программасын сингдириуню не къадар толу хайырланыуну дурус кёргенди. Транспорт инфраструктураны да игилендирмей жарамазлыгъын айырып айтханды вице-премьер.
- Белгиленнген муратлагъа жетиуню эм къыйматлы амалы – регионланы башчыларыны тюз оноу этиулериди. Хар зат да ала кеслерини командалары бла ол борчланы къалай толтурлукъларына кёре боллукъду,-дегенди РФ-ни Правительствосуну Председателини орунбасары.
Андан ары семинар-кенгеш ишчи къауумлада баргъанды. Ол эсепле чыгъарылгъан кенгеш бла бошалгъанды.