«Иппосфера-2021» - арат зэреджэр мэкъуауэгъуэм и 11 - 14-хэм Санкт-Петербург (Бытырбыху) щекIуэкIа шы гъэлъэгъуэныгъэм. Абы хэтащ Адыгейм, Къэбэрдей-Балъкъэрым, Къэрэшей-Шэрджэсым икIахэр.
«Шыхэм дунейр зэкъуагъэувэ», - а псалъащхьэм щIэтущ ди гъэлъэгъуэныгъэр зэредгъэкIуэкIыр», - къыддогуашэ Iуэхум и къызэгъэпэщакIуэ Мигел Лаурэ гъэ къэси гъэмахуэпэм зэхашэ зэпеуэм зыщыхуагъэувыж мурадхэмкIэ. «Гъуэгуанэшхуэ зэпачауэ щытми, адыгэшхэм я фэм ар къиIуатэркъым, зым нэхърэ адрейр нэхъ бжьыфIэу утыкур ягъэщIэращIэ, сыту жыпIэмэ, ахэр нэхъ бэшэчу къалъытэ шы лъэпкъхэм язщ», - дожьу абы Санкт-Петербург къалэм и «ХъыбарегъащIэхэр».
Адыгэш къабзэу 9 Санкт-Петербург нэс зыша адыгэ делегацэм нэхърэ нэхъ ин (цIыху 30) екIуэлIахэм зэрахэмытам нэмыщI, цей екIухэмкIэ зэщыхуэпыкIа ди щIалэхэм «Ищхъэрэ къалащхьэ» адыгэпсэ къыIуагъэкIащ жыпIэмэ, ущыуэнукъым. Абы щыпсэу адыгэхэр я лъэпкъэгъухэм къадэщIыну къызэрекIуэлIам и гугъу тщIыххэркъым.
«Фи гъусэу сурэт зытредгъэх хъуну?» - арат упщIэ псоми япэ итыр. Метрищэр сыхьэт псокIэ ткIуауэ жыпIэ хъунущ», - ягу зэрыхэхъуэр ямыбзыщIу жаIэж зэпеуэм хэта шухэм.
«Дэ мыбы ди щыпэкъакIуэкъым, - Iуэхум щыгъуазэ дещI гъэлъэгъуэныгъэм хэта, адыгэшыр щагъэхъу завод Ставрополь крайм щызыгъэлажьэ шыхъуэ Аникеев Сергей. – Адыгэш 900-м нэс нобэ хамэ къэралхэм щыIэщ, апхуэдэ бжыгъэшхуэкIэ дуней утыкум ит шы лъэпкъ иджыпсту къэралым иIэкъым. ФIыщIэ хуэтщIыну дыхуейт гъэ къэси мыбы дыкъэкIуэн папщIэ зыкъытщIэзыгъакъуэ Адыгэ республикэм и лIыщхьэм. Шу щIалэхэм я мызакъуэу, ди гъусэу къакIуэ артистхэм (зи гугъу ищIыр «Абрэдж» къэфакIуэ гупырщ) апхуэдизкIэ цIыхухэм я лъыр къызэщIагъаплъэри, пхуэIуэтэнукъым адыгэхэм я щэнхабзэр къыщыгъэлъэгъуа пщIантIэ цIыкIум деж щекIуэкIыр».
«Шагъдий вагъуэбэ» зыфIаща унэтIыныгъэм япэ увыпIэ къыщихьащ Хьэблэукъуэ Алкъэс зытеса Налмэс хакIуэм. ЕтIуанэ увыпIэр иратащ Гуэгуш Щихъмурад зытеса Легионым. Ещанэр – Нэхущ Зураб и Бибарсым хуагъэфэщащ. «Еплъхэм я нэфI къыщыхуащ» Къэжэр Аслъэн зытеса Алмазым.
КъызэщIэубыдауэ «Иппосфера-2021» зэхьэзэхуэм къекIуэлIа шыхэм я щытыкIэр къыщапщытэжым, ищхьэкIэ зи гугъу тщIа Хьэблэукъуэ Алкъэс етIуанэ увыпIэм и гъусэу «вице-чемпион» цIэр къыхуагъэфэщащ.
«Дэ мыбы дыкъыщIэкIуэр ди лъэпкъым и хъугъуэфIыгъуэу къэтлъытэ адыгэшращ, - жеIэ Адыгэ республикэм и «Шу хасэм» и тхьэмадэ Тхьэпщокъуэ Жамболэт, ауэ шым и гъусэу ди щэнхабзэри къыздыдохь. Лъэмыжхэр зэпрышын, щэнхабзэхэр зэрыцIыхун хуейщ, нэгъуэщIу узэдекIуэкIыфынукъым. Iэмал имыIэу етIанэгъи дыкъэкIуэнущ япэ увыпIэр здэтхьын папщIэ».
Аникеев Сергей хъыбар къызэрыдигъащIэмкIэ, бадзэуэгъуэм Франджым щекIуэкIыну шы зекIуэм хэтыну ирагъэблэгъащ адыгэ шухэр. Абы зэпищIэнущ Марсель къалэмрэ Парижрэ. Езы Франджым илъэс зыбжанэ хъуауэ щолажьэ «Адыгэшыр фIыуэ зылъагъухэм я зэгухьэныгъэ».
«ЗыгуэркIэ пандемием и щхьэусыгъуэкIэ ар къыдэмыхъулIэмэ, - жеIэ Аникеевым, - Бжьэдыгъукъалэ (Краснодар) и Iэгъуэблагъэм франджыхэр, полякхэр, словакхэр, нэмыцэхэр, белорусхэр хэту дунейпсо шы зекIуэ шыщхьэуIум щедгъэкIуэкIынущ».
АпщIондэху Къэбэрдей-Балъкъэрым «Шэрджэс дерби-2021»-м зыщыхуагъэхьэзыр.